ടൂറിന്: യുവേഫ ചാമ്ബ്യന്സ് ലീഗില് വമ്ബന് തിരിച്ചുവരവുമായി യുവന്റസ്. റൊണാള്ഡോയുടെ ഹാട്രിക് മികവില് രണ്ടാംപാദ പ്രീക്വാര്ട്ടറില് അത്ലറ്റിക്കോ മാഡ്രിഡിനെ യുവെ 3-0ന് തകര്ത്തു. ഇരുപാദങ്ങളിലുമായി 3-2ന്റെ ജയത്തോടെ യുവന്റസ് ക്വാര്ട്ടറിലേക്ക് മാര്ച്ച് ചെയ്തു.
ആദ്യ പാദത്തില് എതിരില്ലാത്ത 2-0നു തോറ്റ യുവെയ്ക്ക് സ്വന്തം മൈതാനത്ത് മികച്ച ജയം അനിവാര്യമായിരുന്നു. കളിയുടെ 27-ാം മിനിറ്റിലായിരുന്നു റൊണോള്ഡോ ഗോള്വേട്ടയ്ക്ക് തുടക്കമിട്ടത്. 49-ാം മിനിറ്റില് രണ്ടാം ഗോളും നേടി. പതുക്കെ കളിയിലേക്ക് തിരിച്ചുവന്ന അത്ലറ്റിക്കോ ആക്രമിക്കാനല്ല, പ്രതിരോധിച്ച് പിടിച്ചുനില്ക്കാനാണ് ശ്രമിച്ചത്.
എന്നാല് 86-ാം മിനിറ്റില് വഴങ്ങിയ പെനാല്റ്റി അത്ലറ്റിക്കോയുടെ പ്രതീക്ഷകള് താളംതെറ്റിച്ചു. ബോക്സിനുള്ളില് ബെര്നാര്ദേസ്ച്ചിയെ എയ്ഞ്ചല് കോറിയ വീഴ്ത്തിയതിന് പെനാല്റ്റി വിധിച്ചു. കിക്ക് എടുക്കാനെത്തിയ റൊണാള്ഡോയ്ക്ക് പിഴച്ചില്ല. പന്ത് അത്ലറ്റിക്കോ ഗോള്കീപ്പര് ജാന് ഒബ്ലാക്കിനെ മറികടന്ന് വലയില്.
ചാമ്ബ്യന്സ് ലീഗില് റൊണാള്ഡോയുടെ എട്ടാം ഹാട്രിക്കായിരുന്നു പിറന്നത്. ഇതോടെ ഹാട്രിക്ക് നേട്ടത്തില് മെസിക്കൊപ്പം റൊണാള്ഡോ എത്തി. ഗ്രൂപ്പ് ഘട്ടത്തില് പിഎസ്വിക്കെതിരായ ഹാട്രിക്കോടെയാണ് മെസി എട്ടാം ഹാട്രിക് നേട്ടത്തില് എത്തിയത്.
