ഗവര്ണരുടെ കാരണം കാണിക്കല് നോട്ടീസ് ചോദ്യം ചെയ്ത് കണ്ണൂര് വി സി ഗോപിനാഥ് രവീന്ദ്രന് അടക്കമുള്ള സംസ്ഥാനത്തെ വിസിമാര് ഹൈക്കോടതിയില്. ഗവര്ണര് നല്കിയ നോട്ടീസ് നിയമ വിരുദ്ധമെന്ന് കാണിച്ചാണ് വി സിമാര് ഹൈക്കോടതിയില് ഹരജി നല്കിയിരിക്കുന്നത്. ഹരജി ഇന്ന് ജസ്റ്റിസ് ദേവന് രാമചന്ദ്രന് പരിഗണിക്കും.
ഗവര്ണരുടെ കാരണം കാണിക്കല് നോട്ടീസ് റദ്ദാക്കണമെന്നും ഹരജിയിലുണ്ട്. ഏഴ് വിസിമാരാണ് ഈ ആവശ്യം ഉന്നയിച്ചിട്ടുള്ളത്. ഗവര്ണറുടെ പുറത്താക്കല് നടപടിക്കെതിരെ കേരള സര്വ്വകലാശാല സെനറ്റ് അംഗങ്ങള് നല്കിയ ഹരജി ഹൈക്കോടതി ഇന്ന് വീണ്ടും പരിഗണിക്കും.
ജസ്റ്റിസ് ദേവന് രാമചന്ദ്രന് തന്നെയാണ് ഈ ഹര്ജിയും പരിഗണിക്കുന്നത്. അംഗത്വം റദ്ദാക്കിയ ഗവര്ണറുടെ നടപടി നിയമ വിരുദ്ധമാണെന്നാണ് ഹരജിയിലുള്ളത്. നവംബര് 4 ന് ചേരുന്ന സര്വ്വകലാശാല സെനറ്റ് യോഗത്തില് സെര്ച്ച് കമ്മിറ്റിയെ നോമിനേറ്റ് ചെയ്യാനുള്ള അജണ്ടയുണ്ടോയെന്ന് സര്വ്വകലാശാല ഇന്ന് അറിയിക്കണം. ഗവര്ണ്ണര് പുറത്താക്കിയ അംഗങ്ങള്ക്ക് നവംബര് 4 ന് ചേരുന്ന സെനറ്റില് പങ്കെടുക്കാനാകുമോ എന്ന് ഇന്ന് കോടതി തീരുമാനിക്കും.