വാരിയംകുന്നത്ത് കുഞ്ഞഹമ്മദ് ഹാജിയുടെ ജീവിതം പറയുന്ന സിനിമയില് നിന്നും സംവിധായകന് ആഷിക് അബുവും നായക കഥാപാത്രത്തെ അവതരിപ്പിക്കാനിരുന്ന പൃഥ്വിരാജും പിന്മാറിയത് വലിയ ചര്ച്ചകള്ക്കാണ് വഴിതെളിച്ചത്. ഇപ്പോഴിതാ ഈ സംഭവത്തെക്കുറിച്ച് മനസ്സുതുറന്നിരിക്കുകയാണ് നടന് പൃഥ്വിരാജ്.
വാരിയംകുന്നന്’ സിനിമയില്നിന്ന് പിന്മാറാനുള്ള തീരുമാനം തന്റേതല്ലെന്നും താന് ആ സിനിമയുടെ നിര്മാതാവോ സംവിധായകനോ അല്ലെന്നും അവരാണ് അതിന് മറുപടി പറയേണ്ടതെന്നും അദ്ദേഹം പറഞ്ഞു.
പൃഥ്വിരാജ്, മംമ്ത മോഹന്ദാസ് എന്നിവരെ പ്രധാന കഥാപാത്രമാക്കി ഛായാഗ്രഹകന് രവി.കെ.ചന്ദ്രന് സംവിധാനം ചെയ്ത ഭ്രമം സിനിമ യു.എ.ഇയില് റിലീസാകുന്നതുമായി ബന്ധപ്പെട്ട് നടത്തിയ വാര്ത്താ സമ്മേളനത്തില് സംസാരിക്കുകയായിരുന്നു അദ്ദേഹം.
തന്റെ വ്യക്തിജീവിതത്തിനും പ്രൊഫഷനും വെളിയില് നടക്കുന്ന കാര്യങ്ങള് ശ്രദ്ധിക്കാറില്ലെന്നും പുറത്ത് നടക്കുന്ന ചര്ച്ചകള്ക്ക് നേരെ സൗകര്യപൂര്വം കണ്ണടക്കുകയും കേള്ക്കാതിരിക്കുകയുമാണ് ചെയ്യാറെന്നും തന്റെ ജീവിതവും തൊഴില്മേഖലയും അതാണ് തന്നെ പഠിപ്പിച്ചതെന്നും പൃഥ്വിരാജ് പറഞ്ഞു.
വാരിയന്കുന്നനുമായി ബന്ധപ്പെട്ട് സാമൂഹിക മാധ്യമങ്ങളില് ഉയര്ന്ന ആരോപണങ്ങള് ശ്രദ്ധിച്ചിരുന്നോ എന്ന ചോദ്യത്തിനായിരുന്നു പൃഥ്വി രാജിന്റെ മറുപടി.