ഷാരോണ് വധക്കേസ് പ്രതി ഗ്രീഷ്മ ആത്മഹത്യക്ക് ശ്രമിച്ചെന്ന് സംശയം. ഛര്ദ്ദിച്ചതിനെ തുടര്ന്ന് തിരുവനന്തപുരം മെഡിക്കല് കോളേജ് ആശുപത്രിയിലേക്ക് മാറ്റി. നെടുമങ്ങാട് പൊലീസ് സ്റ്റേഷനിലെ ശുചിമുറിയില് വച്ച് അണുനാശിനി കഴിച്ചു എന്നാണ് കരുതുന്നത്. ഇന്ന് അറസ്റ്റ് രേഖപ്പെടുത്തി തെളിവെടുപ്പിനായി ഗ്രീഷ്മയെ പാറശാലയിലെ വീട്ടിലേക്ക് കൊണ്ടുവരാനിരിക്കവെയാണ് സംഭവം.
ഗ്രീഷ്മ കുറ്റസമ്മതം നടത്തിയെങ്കിലും കൂടുതല് തെളിവെടുപ്പ് നടത്തേണ്ടതുണ്ടെന്ന് പൊലീസ് പറഞ്ഞു.
ഷാരോണിനെ കൊലപ്പെടുത്താന് ഉപയോഗിച്ച വിഷം ഗ്രീഷ്മയുടെ വീട്ടില് നിന്നും പൊലീസ് കണ്ടെത്തിയിരുന്നു. മൊഴിയില് പറഞ്ഞിട്ടുള്ള കാര്യങ്ങളില് വ്യക്തത വരുത്താനും തെളിവുകള് നശിപ്പിച്ചതിനെ കുറിച്ച് മനസിലാക്കാനുമുണ്ടെന്നാണ് ജില്ലാ ക്രൈം ബ്രാഞ്ച് പറയുന്നത്. കൊല്ലണമെന്ന ഉദേശത്തോടെയാണ് ഷാരോണ് രാജിനെ പ്രതി ഗ്രീഷ്മ വീട്ടിലേക്ക് വിളിച്ചുവരുത്തിയത്.