കുഞ്ചാക്കോ ബോബന്, ആന്റണി വര്‍ഗീസ്, അര്‍ജുന്‍ അശോകന്‍ എന്നിവരെ കേന്ദ്ര കഥാപാത്രങ്ങളാക്കി പുതിയ സിനിമയുമായി ടിനു പാപ്പച്ചന്‍. ‘ചാവേര്‍’ എന്ന് പേരിട്ടിരിക്കുന്ന ചിത്രത്തിന്റെ ഫസ്റ്റ് ലുക്ക് പുറത്ത്. കുഞ്ചാക്കോ ബോബന്റെ ജന്മദിനത്തിലാണ് ടൈറ്റില്‍ പോസ്റ്റര്‍ എത്തിയിരിക്കുന്നത്.
തെയ്യവും തീയും കത്തിയും എല്ലാം ചേര്‍ന്നുള്ള പോസ്റ്റര്‍ സൂചിപ്പിക്കുന്നത് പ്രതികാരത്തിന്റെ കഥയാണ് പറയാന്‍ ഒരുങ്ങുന്നത് എന്നാണ്. മമ്മൂട്ടി നായകനായ ‘അങ്കിള്‍’ ചിത്രത്തിന് ശേഷം ജോയ് മാത്യു തിരക്കഥ ഒരുക്കുന്ന ചിത്രം കൂടിയാണ് ചാവേര്‍. അരുണ്‍ നാരായണ്‍ പ്രൊഡക്ഷന്‍സിന്റെ ബാനറില്‍ അരുണ്‍ നാരായണ്‍ ആണ് ചിത്രം നിര്‍മ്മിക്കുന്നത്.
വേണു കുന്നപ്പിള്ളിയാണ് സഹ നിര്‍മ്മാതാവ്. രാജേഷ് ശര്‍മ്മ, കെ.യു മനോജ്, അനുരൂപ് എന്നിവരും ഒട്ടേറെ പുതുമുഖങ്ങളും ചിത്രത്തില്‍ അഭിനയിക്കുന്നുണ്ട്. സിനിമയുടെ ചിത്രീകരണത്തിനായി തലശേരിയില്‍ ഇട്ട സെറ്റ് ജനശ്രദ്ധ നേടിയതും, ആക്ഷന്‍ സീന്‍ ചെയ്യുന്നതിനിടെ കുഞ്ചാക്കോ ബോബന് പരിക്ക് പറ്റിയതും വാര്‍ത്തയായിരുന്നു.
തലശേരി കടല്‍ പാലത്തിനോട് ചേര്‍ന്ന തായലങ്ങാടിയില്‍ കലാസംവിധായകന്‍ ഗോകുല്‍ ദാസ് ഒരുക്കിയ കൂറ്റന്‍ സെറ്റാണ് ഹിറ്റായത്. ജിന്റോ ജോര്‍ജ് ക്യാമറ ചലിപ്പിക്കുന്ന ഈ ചിത്രത്തിന് സംഗീതമൊരുക്കുന്നത് ജസ്റ്റിന്‍ വര്‍ഗീസ്, എഡിറ്റിംഗ് നിഷാദ് യൂസഫ് നിര്‍വ്വഹിക്കും.
