കേന്ദ്ര ആരോഗ്യമന്ത്രി ജെ പി നദ്ദയുമായി ആരോഗ്യമന്ത്രി വീണാ ജോര്ജ് ഇന്ന് കൂടിക്കാഴ്ച നടത്തിയേക്കും. കൂടിക്കാഴ്ചയ്ക്കായി കേന്ദ്ര ആരോഗ്യമന്ത്രാലയം അനുമതി നല്കി. ഉച്ചയ്ക്ക് ശേഷമാകും കൂടിക്കാഴ്ച. ആശസമരം ഉള്പ്പെടെയുള്ള വിഷയങ്ങള് കൂടിക്കാഴ്ചയില് ചര്ച്ചയാകും.രാവിലെ പത്ത് മണിക്ക് രാജ്യാന്തര വിമാനത്താവളത്തിലെത്തിയ വീണാ ജോര്ജ് കേരളഹൗസിലേക്ക് തിരിച്ചു.
കഴിഞ്ഞ തവണ ക്യൂബന് സംഘത്തെ കാണാന് ഡല്ഹിയിലെത്തിയ വീണാ ജോര്ജ് ജെപി നദ്ദയുമായി കൂടിക്കാഴ്ചയ്ക്ക് സമയം തേടിയിരുന്നെങ്കിലും പാര്ലമെന്റ് നടക്കുന്ന സമയമായതിനാല് അനുമതി ലഭിച്ചിരുന്നില്ല.ആശമാരുടെ നിരാഹാര സമരം ഇന്ന് 13ാം ദിവസത്തിലേക്ക് കടക്കുകയാണ്. വരും ദിവസങ്ങളില് വ്യത്യസ്ത സമര രീതികളുമായി, കൂടുതല് പേരെ അണിനിരത്തിക്കൊണ്ട് സമരം ശക്തിപ്പെടുത്തും. കൂടുതല് പേര് പിന്തുണയുമായി എത്തുമെന്നാണ് കണക്ക് കൂട്ടല്. ഓണറേറിയം 21,000 രൂപയായി വര്ധിപ്പിക്കുക, വിരമിക്കല് ആനുകൂല്യം വര്ധിപ്പിക്കുക തുടങ്ങിയ ആവശ്യങ്ങളുമായാണ് ആശമാര് സമരം തുടങ്ങിയത്.
