ദക്ഷിണ കൊറിയയെ 4-1ന് തകര്ത്ത് ബ്രസീല് 2022 ഫുട്ബോള് ലോകകപ്പിന്റെ ക്വാര്ട്ടര് ഫൈനലില് കടന്നു.അട്ടിമറി സ്വപ്നവുമായി എത്തിയ കൊറിയയെ ബ്രസീല് നിലം തൊടാന് അനുവദിച്ചില്ല. ക്വാര്ട്ടറില് ക്രൊയേഷ്യയാണ് കാനറികളുടെ എതിരാളികള്. ഇന്ന് സ്പെയിന്- മൊറോക്കോയെയും പോര്ച്ചുഗല്- സ്വിറ്റ്സര്ലന്ഡിനെയും നേരിടും.
സൂപ്പര് താരം നെയ്മര് പരിക്കില് നിന്ന് മോചിതനായി തിരിച്ചെത്തിയതിന്റെ ആവേശം മത്സരത്തിന്റെ തുടക്കം തൊട്ട് ബ്രസീല് ക്യാംപില് ദൃശ്യമായിരുന്നു. ആക്രമിച്ച് കളിച്ചാണ് ഇരുടീമുകളും തുടങ്ങിയത്. ഏഴാം മിനിറ്റില് തന്നെ മഞ്ഞപ്പട കൊറിയന് വല കുലുക്കി. വിനീഷ്യസ് ജൂനിയറാണ് ബ്രസീലിനായി ആദ്യ ഗോള് നേടിയത്. റാഫീന്യയുടെ തകര്പ്പന് മുന്നേറ്റത്തില് നിന്നാണ് ഗോള് പിറന്നത്. വലതുവിങ്ങില് നിന്ന് പന്തുമായി കുതിച്ച റാഫീന്യ നല്കിയ ക്രോസ് റിച്ചാര്ലിസണ് കണക്റ്റ് ചെയ്യാനായില്ലെങ്കിലും അതെത്തിയത് മാര്ക്ക് ചെയ്യപ്പെടാതെയിരുന്ന വിനീഷ്യസിന്റെ കാലിലാണ്. കിട്ടിയ അവസരം മുതലെടുത്ത വിനീഷ്യസ് തകര്പ്പന് ഫിനിഷിലൂടെ പന്ത് വലയിലെത്തിച്ചു.
പെനാല്റ്റിയിലൂടെ ബ്രസീല് വീണ്ടും ഗോളടിച്ചു. ഇത്തവണ നെയ്മറാണ് കാനറികള്ക്കായി ഗോളടിച്ചത്. റിച്ചാര്ലിസണെ ബോക്സിനുള്ളില് വെച്ച് ജങ് വോയങ് വീഴ്ത്തിയതിനെത്തുര്ന്ന് റഫറി ബ്രസീലിന് പെനാല്റ്റി അനുവദിച്ചു. കിക്കെടുത്ത നെയ്മറിന് തെറ്റിയില്ല. ഗോള്കീപ്പറെ കബിളിപ്പിച്ച് സ്വതസിദ്ധമായ ശൈലിയില് നെയ്മര് വലകുലുക്കി. ഇതോടെ ആദ്യ 13 മിനിറ്റില് തന്നെ ബ്രസീല് 2-0 ന് മുന്നിലെത്തി.
