വീണ ജോര്ജിന്റെ ഓഫീസിലെ നിയമനത്തട്ടിപ്പ് കേസില് ആരോപണം ഉന്നയിച്ച ഹരിദാസിന്റെ മൊഴി പൊലീസ് രേഖപ്പെടുത്തും. മലപ്പുറം സ്വദേശിയായ ഹരിദാസിനോട് രേഖകള് ഉള്പ്പെടെ ഹാജരാക്കി മൊഴി നല്കാന് കന്റോണ്മെന്റ് പൊലീസ് ആവശ്യപ്പെട്ടിട്ടുണ്ട്. മന്ത്രിയുടെ പി എ അഖില് മാത്യുവിന്റെ പരാതിയിലാണ് കേസ്. എന്നാല്, അഖില് മാത്യു തന്നെയാണ് സെക്രട്ടറിയേറ്റിന്റെ സമീപംവച്ച് പണം വാങ്ങിയതെന്ന ഉറച്ച നിലപാടിലാണ് കൈക്കൂലി നല്കിയ ഹരിദാസ്. അതേസമയം, ഹരിദാസിന്റെ മരുമകള് കൈമാറിയ നിയമന ഉത്തരവ് വ്യാജമായി ഉണ്ടാക്കിയതെന്നാണ് പൊലീസ് നിഗമനം.
കത്തിലെ ലോഗോയും വാചകങ്ങളും ആയുഷ് കേരളം അയക്കുന്നതിന് സമാനമല്ല. ആയതിനാല് ഇതിന്റെ നിജസ്ഥിതി അറിയാന് ആരോഗ്യ കേരളത്തിന്റെ ഓഫിസിലും പരിശോധന നടത്തും. മെഡിക്കല് ഓഫീസര് നിയമനത്തിന് ആരോഗ്യമന്ത്രിയുടെ പേഴ്സണല് സ്റ്റാഫ് അഖില് മാത്യു കോഴ വാങ്ങിയെന്ന് ഗുരുതര ആരോപണം പുറത്ത് വന്നതിന് പിന്നാലെയാണ് അഖില് മാത്യു പൊലീസില് പരാതി നല്കിയത്. അഖില് മാത്യുവിന് ഒരു ലക്ഷവും ഇടനിലക്കാരനായ സിഐടിയു പത്തനംതിട്ട മുന് ഓഫീസ് സെക്രട്ടറി അഖില് സജീവിന് 75,000 രൂപയും കൈമാറിയെന്നാണ് മലപ്പുറം സ്വദേശി ഹരിദാസന്റെ ആരോപണം.
