നടിയെ ആക്രമിച്ച കേസുമായി ബന്ധപ്പെട്ട വധഗൂഢാലോചന കേസില്‍ ദിലീപിന്റെ സഹോദരന്‍ അനൂപിനും സഹോദരി ഭര്‍ത്താവ് സുരാജിനും വീണ്ടും ക്രൈംബ്രാഞ്ച് നോട്ടീസ്. ചൊവ്വാഴ്ച രാവിലെ 11 മണിക്ക് ചോദ്യം ചെയ്യലിന് ഹാജരാകണം എന്നറിയിച്ചാണ് നോട്ടീസ് അയച്ചിരിക്കുന്നത്. ആലുവ പൊലീസ് ക്ലബില്‍ ഹാജരാകാനാണ് നിര്‍ദ്ദേശം.
ഐടി വിദഗ്ധന്‍ സായ് ശങ്കറിന്റെ മൊഴിയും നാളെ രേഖപ്പെടുത്തിയേക്കും. നാളെ ഉച്ചയ്ക്ക് രണ്ടു മണിയ്ക്ക് ആലുവ പൊലീസ് ക്ലബില്‍ ഹാജരാകാനാണ് ആവശ്യപ്പെട്ടിരിക്കുന്നത്. കേസിലെ ഏഴാം പ്രതിയാണ് സായ് ശങ്കര്‍. ദിലീപിന്റെ ഫോണില്‍ നിന്നും കേസുമായി നിര്‍ണായക തെളിവുകള്‍ നശിപ്പിച്ചത് ഇയാളാണെന്ന് സംഘം കണ്ടെത്തിയിരുന്നു.
അതേസമയം നടിയെ ആക്രമിച്ച കേസിലെ തുടരന്വേഷണ റിപ്പോര്‍ട്ട് നാളെ കോടതിക്ക് കൈമാറും. തുടരന്വേഷണത്തിന് കോടതി അനുവദിച്ച സമയം അവസാനിച്ചിരിക്കുന്ന സാഹചര്യത്തില്‍ അന്വേഷണ സംഘം കൂടുതല്‍ സമയം വേണമെന്നും കോടതിയെ അറിയിക്കും. കേസില്‍ ഇനി മൊഴി രേഖപ്പെടുത്തേണ്ടവരുടെ പട്ടികയും അന്വേഷണം സംഘം സമര്‍പ്പിക്കും.
