സ്വര്ണക്കടത്ത് കേസില് നടി രന്യ റാവുവിന് 102 കോടി രൂപ പിഴ ചുമത്തി റവന്യൂ ഇന്റലിജന്സ് ഡയറക്ടറേറ്റ്. ഹോട്ടല് വ്യവസായി തരുണ് കൊണ്ടരാജു, ജ്വല്ലറി ഉടമകളായ സഹില് സകാരിയ, ഭരത് കുമാര് ജെയിന് എന്നിവര്ക്കും പിഴയിട്ടിട്ടുണ്ട്. ഇവര്ക്ക് 63 കോടി, 56 കോടി രൂപ വീതമാണ് പിഴ.
ചൊവ്വാഴ്ച്ച ബെംഗളൂരു സെന്ട്രല് ജയിലില് എത്തിയ ഡിആര്ഐ ഉദ്യോഗസ്ഥര് മൂന്ന് പേര്ക്കും 250 പേജ് വരുന്ന നോട്ടീസും 2500 പേജുള്ള മറ്റ് രേഖകളും കൈമാറി.മാര്ച്ച് നാലിനാണ് സ്വര്ണക്കടത്ത് കേസില് നടി രന്യ റാവു അറസ്റ്റിലായത്. ദുബായില് നിന്ന് ബെംഗളൂരുവിലേക്ക് സ്വര്ണം കടത്താനായിരുന്നു ശ്രമം.
സ്വര്ണം ഇവര് ധരിക്കുകയും ശരീരത്തില് ഒളിപ്പിക്കുകയും ചെയ്തിരുന്നു. 14.8 കിലോ ഗ്രാം സ്വര്ണമാണ് ഇവരില് നിന്ന് റവന്യൂ ഇന്റലിജന്സ് വിഭാഗം കണ്ടെടുത്തത്.അറസ്റ്റിലാകുന്നതിന് മുമ്പ് നാല് തവണ നടി ദുബായ് സന്ദര്ശനം നടത്തിയതോടെ ഡിആര്ഐയുടെ നിരീക്ഷണത്തിലാകുകയായിരുന്നു.
കര്ണാടകയിലെ ഉന്നത പൊലീസ് ഉദ്യോഗസ്ഥന്റെ മകളാണെന്ന് പറഞ്ഞ് രന്യ പരിശോധനയില് നിന്ന് രക്ഷപ്പെടാന് ശ്രമിച്ചെങ്കിലും റവന്യൂ ഇന്റലിജന്സ് സംഘം വിട്ടുകൊടുത്തില്ല. നടിയെ കസ്റ്റഡിയിലെടുക്കുകയും വിശദമായ ചോദ്യം ചെയ്യലിന് ശേഷം അറസ്റ്റ് രേഖപ്പെടുത്തുകയുമായിരുന്നു.രന്യയുടെ അറസ്റ്റിന് തൊട്ടുപിന്നാലെയായിരുന്നു സുഹൃത്ത് തരുണ് രാജിനെ പൊലീസ് കസ്റ്റഡിയിൽ എടുക്കുന്നത്. വിശദമായ ചോദ്യം ചെയ്യലിന് ശേഷമാണ് തരുൺ രാജിന്റെ അറസ്റ്റ് പൊലീസ് രേഖപ്പെടുത്തിയത്.
കേസിലെ രണ്ടാം പ്രതിയാണ് തരുണ്. കര്ണാടകയിലെ ഹോട്ടല് ഉടമയുടെ കൊച്ചുമകനായ തരുണും രന്യയും ആദ്യം സുഹൃത്തുക്കളായിരുന്നു. പിന്നീട് രന്യയുടെ വിവാഹത്തോടെ ഇരുവരും പിരിഞ്ഞെങ്കിലും സ്വര്ണക്കടത്തില് ഇവര് ഒന്നിച്ച് പ്രവര്ത്തിച്ചിരുന്നതായാണ് പൊലീസ് കണ്ടെത്തിയത്. ഇരുവരും ഒരുമിച്ച് 26 ദുബായ് യാത്രകള് നടത്തിയിരുന്നതായും ഈ യാത്രകളിലെല്ലാം ഇവര് സ്വര്ണം കടത്തിയിരുന്നുവെന്നും പൊലീസ് കണ്ടെത്തി.
