മധുര: വോട്ടിംഗ് മെഷീനുകളും വിവിപാറ്റ് യൂണിറ്റുകളും സൂക്ഷിച്ചിരുന്ന സ്ട്രോംഗ് റൂമിന് അരികെയുള്ള മുറിയിലേക്ക് അതിക്രമിച്ചു കയറിയ ഉദ്യോഗസ്ഥര്‍ക്കു സസ്പെന്‍ഷന്‍. തമിഴ്നാട്ടിലെ മധുര ലോക്സഭാ മണ്ഡലത്തിലാണു സംഭവം. ഒരു വനിതാ എക്സൈസ് ഉദ്യോഗസ്ഥയെയും മൂന്നു സര്‍ക്കാര്‍ ജീവനക്കാരെയുമാണ് സസ്പെന്‍ഡ് ചെയ്തത്.
മധുരയിലെ സിപിഎം സ്ഥാനാര്‍ഥി സു. വെങ്കടേശനാണ് ഇതു സംബന്ധിച്ചു തെരഞ്ഞെടുപ്പ് കമ്മീഷനു പരാതി നല്‍കിയത്. കനത്തസുരക്ഷ മറികടന്ന് വോട്ടെണ്ണല്‍ കേന്ദ്രത്തിലെത്തി രേഖകള്‍ ചോര്‍ത്തിയെന്നാണ് പരാതിയില്‍ ആരോപിച്ചത്. ഉദ്യോഗസ്ഥര്‍ ശനിയാഴ്ച മൂന്നു മണിക്കൂര്‍ സ്ട്രോംഗ് റൂമിന് അരികെയുള്ള മുറിയില്‍ ചെലവഴിച്ചുവെന്നും രേഖകള്‍ പരിശോധിച്ച്‌ പകര്‍പ്പെടുത്തുവെന്നും സു. വെങ്കടേശന്‍ ആരോപിച്ചു.
തഹസില്‍ദാരും സംഘവും അകത്ത് പ്രവേശിച്ചതിന്‍റെ സിസിടിവി ദൃശ്യങ്ങള്‍ സ്ഥിരീകരിച്ചശേഷമാണ് ഇവരെ സസ്പെന്‍ഡ് ചെയ്യാന്‍ ജില്ലാ തെരഞ്ഞെടുപ്പ് ഓഫീസര്‍ ഉത്തരവിട്ടത്. എന്നാല്‍ ഇവര്‍ രേഖകള്‍ പരിശോധിച്ചെന്നും വോട്ടിംഗ് മെഷീനുകളും വിവിപാറ്റ് യൂണിറ്റുകളും സൂക്ഷിച്ചിരുന്ന സ്ട്രോംഗ് റൂമില്‍ പ്രവേശിച്ചെന്നുമുള്ള ആരോപണം തെരഞ്ഞെടുപ്പ് ഓഫീസര്‍ നിഷേധിച്ചു.
