ന്യൂഡല്ഹി: സുനന്ദ പുഷ്കറിന്റെ ദുരൂഹ മരണവുമായി ബന്ധപ്പെട്ട കേസില് മുന് കേന്ദ്രമന്ത്രിയും തിരുവനന്തപുരം എം.പിയുമായ ശശി തരൂരിനെ പ്രതിയാക്കി ഡല്ഹി പൊലീസ് പാട്യാല കോടതിയില് കുറ്റപത്രം സമര്പ്പിച്ചു. ആത്മഹത്യാപ്രേരണ, ഗാര്ഹികപീഡനം എന്നീ കുറ്റങ്ങളാണ് തരൂരിനെതിരെ ചുമത്തിയിരിക്കുന്നത്.
2014 ജനുവരി 17നാണ് ഡല്ഹിയിലെ ലീലാ ഹോട്ടലിലെ റൂം നമ്ബര് 345ല് സുനന്ദ പുഷ്കറിനെ മരിച്ച നിലയില് കണ്ടെത്തിയത്. മാനസിക സമ്മര്ദ്ദം കുറയ്ക്കുന്നതിനുള്ള ഗുളിക അമിതമായ തോതില് കഴിച്ചതാണ് സുനന്ദയുടെ മരണത്തിന് കാരണമായതെന്നായിരുന്നു നേരത്തെയുള്ള നിഗമനം. എന്നാല് സുനന്ദയുടെ ആന്തരികാവയവങ്ങള് പരിശോധിച്ചതില് നിന്ന് വിഷം ഉള്ളില് ചെന്നുള്ള അസ്വാഭാവിക മരണം എന്നാണ് ഡല്ഹി ഓള് ഇന്ത്യ ഇന്സ്റ്റിറ്റ്യൂട്ട് ഒഫ് മെഡിക്കല് സയന്സസ് പൊലീസിന് നല്കിയ റിപ്പോര്ട്ടില് പറയുന്നത്.
