കൊല്ലം: സിപിഐ 23ാം പാര്ട്ടി കോണ്ഗ്രസിന് നാളെ കൊല്ലത്ത് തുടക്കം. സി.കെ. ചന്ദ്രപ്പന് നഗറില് ജനറല് സെക്രട്ടറി എസ്. സുധാകര് റെഡ്ഡി പതാക ഉയര്ത്തും. 25ന് ഉച്ചക്ക് രണ്ടിന് പ്രതിനിധികളുടെ രജിസ്ട്രേഷന് ആരംഭിക്കും. 26ന് രാവിലെ 10ന് എ.ബി. ബര്ദന് നഗറില് (യൂനുസ് കണ്വെന്ഷന് സെന്റര്) മുതിര്ന്ന കമ്യൂണിസ്റ്റ് നേതാവും കേന്ദ്ര കണ്ട്രോള് കമീഷന് അംഗവുമായ സി.എ. കുര്യന് പതാക ഉയര്ത്തും.11ന് പ്രതിനിധി സമ്മേളനം ജനറല് സെക്രട്ടറി എസ്. സുധാകര് റെഡ്ഡി ഉദ്ഘാടനം ചെയ്യും. സീതാറാം യെച്ചൂരി (സിപിഎം), ദേബബ്രത ബിശ്വാസ് (ഫോര്വേഡ് ബ്ലോക്ക്), ക്വിറ്റി ഗോസ്വാമി (ആര്.എസ്.പി), പ്രൊവാഷ് ഘോഷ് (എസ്.യു.സി.ഐ), ദീപാങ്കര് ഭട്ടാചാര്യ (സി.പി.ഐ-എം.എല്) തുടങ്ങിയ ഇടതു നേതാക്കള് ഉദ്ഘാടന സമ്മേളനത്തില് പങ്കെടുക്കും.
വൈകീട്ട് മൂന്നിന് തുടരുന്ന പ്രതിനിധി സമ്മേളനത്തില് കരട് രാഷ്ട്രീയ പ്രമേയവും കരട് രാഷ്ട്രീയ റിവ്യൂ റിപ്പോര്ട്ടും കരട് സംഘടനാ റിപ്പോര്ട്ടും അവതരിപ്പിക്കും. 27, 28 തീയതികളില് റിപ്പോര്ട്ടുകളിന്മേല് പൊതുചര്ച്ചയും നടക്കും. 28ന് ഉച്ചക്കുശേഷം ജനറല് സെക്രട്ടറിയുടെ മറുപടിയെ തുടര്ന്ന് റിപ്പോര്ട്ടുകള് പാര്ട്ടി കോണ്ഗ്രസ് അംഗീകരിക്കും. 29ന് രാവിലെ പുതിയ ദേശീയ കൗണ്സിലിനെയും, ജനറല് സെക്രട്ടറിയെയും, കണ്ട്രോള് കമീഷനെയും തെരഞ്ഞെടുക്കും. ജനറല് സെക്രട്ടറി എസ് സുധാകര് റെഡ്ഡി സ്ഥാനമൊഴിഞ്ഞേക്കും. പകരം അതുല്കുമാര് അഞ്ജാന്, അമര്ജിത് കൗര് തുടങ്ങിയ പേരുകളാണ് ജനറല് സെക്രട്ടറി സ്ഥാനത്തേക്ക് ഉയര്ന്നുകേള്ക്കുന്നത്.
സമാപന ദിവസം വൈകീട്ട് മൂന്നിന് ഒരു ലക്ഷം ചുവപ്പ് വളന്റിയര്മാര് അണിനിരക്കുന്ന മാര്ച്ച് നടക്കും. സി.കെ. ചന്ദ്രപ്പന് നഗറില് പൊതുസമ്മേളനവും ചേരും. ദേശീയ എക്സിക്യൂട്ടിവ് അംഗങ്ങളും കണ്ട്രോള് കമീഷന് അംഗങ്ങളും അടക്കം 900 പ്രതിനിധികളാണ് പാര്ട്ടി കോണ്ഗ്രസില് പങ്കെടുക്കുന്നത്.