സംസ്ഥാനത്തെ 6 ജില്ലകളില് ഇന്ന് തൈപൊങ്കല് അവധി. തിരുവനന്തപുരം, കൊല്ലം, പത്തനംതിട്ട, ഇടുക്കി, പാലക്കാട്, വയനാട് ജില്ലകളിലാണ് അവധി പ്രഖ്യാപിച്ചിരിക്കുന്നത്.തമിഴ്നാടുമായി അതിർത്തി പങ്കിടുന്ന ജില്ലകളിലാണ് പ്രാദേശിക അവധിയുള്ളത്. ഈ ജില്ലകളില് സംസ്ഥാന വൈദ്യുതി ബോര്ഡിന്റെ കാര്യാലയങ്ങള് അവധിയായിരിക്കുമെന്ന് കെഎസ്ഇബിയും അറിയിച്ചിട്ടുണ്ട്.
വൈദ്യുതി തടസ്സം ഉണ്ടാകാത്ത രീതിയില് ക്രമീകരണങ്ങള് ഏര്പ്പെടുത്തണം. വൈദ്യുതി തകരാറുണ്ടായാല് ഉടനടി പരിഹരിക്കാന് വേണ്ട മുന്കരുതലുകള് സ്വീകരിച്ചിട്ടുണ്ടെന്ന് ബന്ധപ്പെട്ട എല്ലാ ഫീല്ഡ് ഓഫീസര്മാരും ഉറപ്പ് വരുത്തേണ്ടതാണ്. ക്യാഷ് കൗണ്ടറുകള്ക്കും അവധിയായിരിക്കും. എന്നാല് ഉപഭോക്താക്കള്ക്ക് വിവിധ ഓണ്ലൈന് മാര്ഗ്ഗങ്ങളിലൂടെ പണമടയ്ക്കാന് കഴിയുമെന്നും കെ.എസ്.ഇ.ബി. അറിയിച്ചു.
സംസ്ഥാന സർക്കാരിന്റെ ഔദ്യോഗിക കലണ്ടർ പ്രകാരമുള്ള അവധിയാണിത്. തമിഴ്നാട്ടിലെ പ്രധാന ആഘോഷമാണ് തൈപ്പൊങ്കല്. തമിഴ്നാട് പൊങ്കലിനോട് അനുബന്ധിച്ച് നീണ്ട അവധിയാണ് പ്രഖ്യാപിച്ചിട്ടുള്ളത്. ജനുവരി പത്ത് മുതല് 16 വരെ തമിഴ്നാട്ടിലെ എല്ലാ സ്കൂളുകള്ക്കും അവധിയാണ്. 15 വരെയാണ് ആദ്യം അവധി പ്രഖ്യാപിച്ചിരുന്നത്.
എന്നാല് തീയതി നീട്ടണമെന്ന ശക്തമായ ആവശ്യം ഉയര്ന്നതോടെ ഒരു ദിവസം കൂടി അവധി നല്കുകയായിരുന്നു. തമിഴ്നാടിനൊപ്പം തെലങ്കാനയും പൊങ്കലിന് സമാനമായി നീണ്ട അവധി പ്രഖ്യാപിച്ചിട്ടുണ്ട്. ജനുവരി 17നായിരിക്കും പൊങ്കല് അവധി കഴിഞ്ഞ് സ്കൂളുകള് തുറക്കുക.
