കോവിഡ് കാലത്ത് പ്രതിസന്ധിയിലായവരെ കയ്യഴിച്ച് സഹായിച്ച് ശ്രദ്ധേയനായ വ്യക്തിയാണ് ചലച്ചിത്ര താരം സോനു സൂദ്. ലോക്ക് ഡൗണ് കാലയളവില് രാജ്യത്തിന്റെ വിവിധ ഭാഗങ്ങളിലായി കുടുങ്ങിപ്പോയ കുടിയേറ്റ തൊഴിലാളികള്ക്ക് ഭക്ഷണം നല്കാനും അവരെ സുരക്ഷിതമായി നാട്ടിലെത്തിക്കാനുമടക്കം സോനു സൂദ് സുപ്രധാനമായ പങ്കു വഹിച്ചിരുന്നു.
ലോക്ക് ഡൗണില് ജോലി നഷ്ടപ്പെട്ടവരെയും ചികിത്സ സഹായം ആവശ്യമായവരെയും സാമ്പത്തികമായി സഹായിച്ചും വിദ്യാര്ഥികള്ക്ക് ഓണ്ലൈന് പഠനത്തിനുള്ള സൗകര്യമൊരുക്കിയും ദുര്ബ്ബല വിഭാഗങ്ങളിലെ വിദ്യാര്ഥികള്ക്ക് സ്കോളര്ഷിപ്പ് ഏര്പ്പെടുത്തിയും വന് ജനസ്വീകാര്യതയാണ് രാജ്യത്തെമ്പാടും സോനു സൂദിന് ലഭിച്ചത്.
ദിനംപ്രതി നിരവധി പേരാണ് സോനുവിനോട് സഹായമഭ്യര്ഥിക്കുന്നത്. അതില് മെഡിക്കല് ബില്ലടക്കുമോ? വിദ്യാഭ്യാസ ചെലവു വഹിക്കുമോ? തുടങ്ങി കാര് വാങ്ങിത്തരാമോ? മാലിദ്വീപ് യാത്ര സ്പോണ്സര് ചെയ്യാമോ? എന്നിങ്ങനെയുള്ള രസകരമായ ആവശ്യങ്ങള് വരെയുണ്ട്. അത്തരത്തിലൊരു സഹായാഭ്യര്ഥനയ്ക്ക് രസകരമായി തന്നെ മറുപടി നല്കിയിരിക്കുകയാണ് സോനു.
“സര് താങ്കള് വിവാഹം നടത്തിത്തരുമോ?” എന്നായിരുന്നു ആരാധകന്റെ ചോദ്യം. “എന്തുകൊണ്ട് പാടില്ല, വേണമെങ്കില് വിവാഹ മന്ത്രം വരെ ചൊല്ലിത്തരാം, പെണ്കുട്ടിയെ കണ്ടെത്താനുള്ള ജോലി മാത്രം നിങ്ങള് നോക്കിയാല് മതി” എന്നായിരുന്നു സോനുവിന്റെ മറുപടി.
