പാരീസ്: റഫാല്‍ യുദ്ധവിമാന ഇടപാടിന്‍റെ കരാറില്‍ റിലയന്‍സിനെ പങ്കാളിയാക്കിയതു സംബന്ധിച്ച ഫ്രഞ്ച് മാധ്യമത്തിന്‍റെ റിപ്പോര്‍ട്ട് തള്ളി റഫാല്‍ നിര്‍മാതാക്കളായ ദസോ ഏവിയേഷന്‍ രംഗത്ത്. റിലയന്‍സിനെ തെരഞ്ഞെടുത്തത് കന്പനിയുടെ സ്വതന്ത്രമായ തീരുമാനമാണ്. പങ്കാളിയെ തെരഞ്ഞെടുത്തത് ഇന്ത്യയും ഫ്രാന്‍സും തമ്മിലുണ്ടാക്കിയ കരാറിന്‍റെ ചട്ടക്കൂടിനകത്ത് നിന്നെന്നും ദസോ ഏവിയേഷന്‍ വ്യക്തമാക്കി.
റഫാല്‍ കരാറില്‍ റിലയന്‍സിനെ പങ്കാളിയാക്കണമെന്നു നിര്‍ബന്ധിത വ്യവസ്ഥ ഉണ്ടായിരുന്നതായി ഫ്രഞ്ച് മാധ്യമമായ മീഡിയ പാര്‍ടാണ് റിപ്പോര്‍ട്ട് ചെയ്തത്. ദസോ ഏവിയേഷന്‍റെ കൈവശമുള്ള ഇതു സംബന്ധിച്ച രേഖ തങ്ങള്‍ക്കു ലഭിച്ചതായി മീഡിയപാര്‍ട്ട് അവകാശപ്പെട്ടിരുന്നു.
റഫാല്‍ ഇടപാടില്‍ റിലയന്‍സ് ഡിഫെന്‍സിനെ ഉള്‍പ്പെടുത്താന്‍ ഇന്ത്യന്‍ സര്‍ക്കാര്‍ നിര്‍ബന്ധിച്ചതായുള്ള ഫ്രഞ്ച് മുന്‍ പ്രസിഡന്‍റ് ഫ്രാന്‍സ്വാ ഒളാന്ദിന്‍റെ വിവാദപരാമര്‍ശം പ്രസിദ്ധീകരിച്ചതും മീഡിയപാര്‍ട്ടായിരുന്നു. മീഡിയപാര്‍ട്ടില്‍ എഴുതിയ ലേഖലത്തിലാണ് ദസോ ഏവിയേഷന്‍റെ പങ്കാളിയായി റിലയന്‍സിനെ കേന്ദ്ര സര്‍ക്കാര്‍ നിര്‍ദേശിച്ചെന്ന് ഒളാന്ദ് പറഞ്ഞത്.
