ന്യൂഡല്ഹി: റഫാല് വിഷയത്തില് പാര്ലമെന്റില് ചര്ച്ച നടത്താമെന്ന സര്ക്കാര് വെല്ലുവിളി കോണ്ഗ്രസ് ഏറ്റെടുത്തു. കോണ്ഗ്രസ് ചര്ച്ചകളില്നിന്ന് ഓടിയൊളിക്കുകയാണെന്ന ധനമന്ത്രി അരുണ് ജെയ്റ്റ്ലിയുടെ പ്രസ്താവനയോട് പ്രതികരിച്ചുകൊണ്ട് മുതിര്ന്ന കോണ്ഗ്രസ് നേതാവ് മല്ലുകാര്ജുന് ഗാര്ഗെയാണ് ഇക്കാര്യം അറിയിച്ചത്. സ്പീക്കര് സുമത്രാ മഹാജന് ബുധനാഴ്ച ഇതിനായി പ്രത്യേക സമയം തീരുമാനിക്കണമെന്ന് പാര്ലമെന്റിലെ പ്രതിപക്ഷനേതാവു കൂടിയായ ഗാര്ഗെ ആവശ്യപ്പെട്ടു.
ജെയ്റ്റ്ലി വെല്ലുവിളി മുന്നോട്ടുവച്ചു. തങ്ങള് അത് സ്വീകരിച്ചിരിക്കുകയാണ്. ബുധനാഴ്ച ചര്ച്ചയ്ക്കായി കോണ്ഗ്രസ് തയാറാണ്. ദയവായി സമയം തീരുമാനിക്കുവെന്ന് ഗാര്ഗെ ലോക്സഭയില് പറഞ്ഞു. റഫാല് വിഷയത്തില് സംയുക്ത പാര്ലമെന്ററി സമതി അന്വേഷണം വേണമെന്ന പ്രതിപക്ഷ ആവശ്യത്തില് ഒടുവില് ചര്ച്ചയ്ക്കു സര്ക്കാര് നിര്ബന്ധിതമായിരിക്കുകയാണ്. ശൈത്യകാല സമ്മേളനത്തിന്റെ ആദ്യ ദിവസം മുതല് കോണ്ഗ്രസ് ഈ ആവശ്യം ഉന്നയിച്ചുവരികയായിരുന്നു.
പാര്ലമെന്റില് ഗാര്ഗെയുടെ വെല്ലുവിളിക്ക് മറുപടിയായാണ് ജെയ്റ്റ്ലി ചര്ച്ചയ്ക്കു ക്ഷണിച്ചത്. നിങ്ങള്ക്ക് ധൈര്യമുണ്ടെങ്കില് എത്രയും വേഗം ചര്ച്ചയ്ക്കു തയാറാകു എന്നായിരുന്നു ഗാര്ഗെയുടെ വെല്ലുവിളി.
