മലപ്പുറം: മലപ്പുറത്തിനു സമീപം കൂട്ടിലങ്ങാടിയില് ഗുഡ്സ് ഓട്ടോയില് ടാങ്കര് ലോറിയിടിച്ചു മൂന്നു ഇതര സംസ്ഥാന തൊഴിലാളികള് മരിച്ചു. രണ്ടു പേരുടെ നില ഗുരുതരം. ബംഗാള് സ്വദേശികളായ എസ്.കെ സാദത്ത് (40), എസ്.കെ സബീര് അലി (41), സെയ്തുല്ഖാന് (37) എന്നിവരാണ് മരിച്ചത്.
പരിക്കേറ്റ നിസാമുദീന്, ദീപക്കര് മണ്ഡല് എന്നിവരെ മഞ്ചേരി മെഡിക്കല് കോളജ് ആശുപത്രിയില് പ്രവേശിപ്പിച്ചു. കോഴിക്കോട്-പാലക്കാട് ദേശീയപാതയില് കൂട്ടിലങ്ങാടി പെട്രോള് പന്പിനു മുന്നില് ചൊവ്വാഴ്ച രാവിലെ 6.14നാണ് അപകടമുണ്ടായത്.
മംഗലാപുരത്തു നിന്നു എല്പിജിയുമായി പെരിന്തല്മണ്ണ ഭാഗത്തേക്കു പോവുകയായിരുന്ന ടാങ്കര് ലോറി സകോര്പിയോ വാനിന്റെ പിറകിലിടിച്ചു നീങ്ങി എതിരെ വന്ന ഗുഡ്സ് ഓട്ടോയില് കൂട്ടിയിടിക്കുകയായിരുന്നു. പെട്രോള് പന്പിനു മുന്നില് സ്കോര്പിയോ വാന് തിരിക്കുന്നതിനിടെയാണ് ടാങ്കര് ഇടിച്ചത്.
തൊഴിലാളികള് ഓട്ടോയ്ക്കു പുറത്താണ് സഞ്ചരിച്ചിരുന്നത്. സ്കോര്പിയോയില് സഞ്ചരിച്ചിരുന്ന ആര്ക്കും പരിക്കില്ല. ഓടികൂടിയ പെട്രോള് പന്പിലെ ജീവനക്കാരും നാട്ടുകാരുമാണ് അപകടത്തില് പരിക്കേറ്റവരെ ആശുപത്രിയിലെത്തിച്ചത്.
വിവരമറിഞ്ഞു മലപ്പുറം പോലീസും സ്ഥലത്തെത്തി. ഗുഡ്സ് ഓട്ടോയിലടക്കം തൊഴിലാളികളെ പുറത്തു കുത്തിനിറച്ചാണ് ജോലി സ്ഥലങ്ങളിലേക്കു കൊണ്ടുപോകുന്നത്. ഇതു പാടില്ലെന്നു അധികൃതര് പല തവണ അറിയിച്ചിട്ടും കെട്ടിടനിര്മാണ കരാറുകള് ചെവിക്കൊള്ളുന്നില്ല.