ഉത്തര്പ്രദേശിലെ ജയിലില് കഴിയുന്ന മാധ്യമപ്രവര്ത്തകന് സിദ്ദിഖ് കാപ്പന് ജയില്മോചിതനായി. നീതി പൂര്ണമായി ലഭിച്ചിട്ടില്ലെന്ന് പുറത്തിറങ്ങിയ ശേഷം സിദ്ദിഖ് കാപ്പന് മാധ്യമ പ്രവര്ത്തകരോട് വിശദീകരിച്ചു.തന്റെ കൂടെയുള്ള പലരും ഇപ്പോഴും കള്ളക്കേസില് കുടുങ്ങി ജയിലില് കിടക്കുകയാണെന്നും, അവര്ക്ക് നീതി വേണമെന്നും കാപ്പന് ആവശ്യപ്പെട്ടു. മോചനത്തിനുള്ള ഉത്തരവ് ലക്നൗ കോടതി ജയില് അധികൃതര്ക്ക് ഇന്നലെ അയച്ചിരുന്നു. എന്ഫോഴ്സ്മെന്റ് ഡയറക്ടറേറ്റ് എടുത്ത കേസില് കഴിഞ്ഞ മാസം അവസാനമാണ് സിദ്ദിഖ് കാപ്പന് ജാമ്യം ലഭിച്ചത്.
യുപിയിലെ ഹത്രസില് കൂട്ടബലാത്സംഗത്തിനിരയായി കൊല്ലപ്പെട്ട ദളിത് പെണ്കുട്ടിയുടെ വീട് സന്ദര്ശിക്കാനുള്ള യാത്രയ്ക്കിടെയായിരുന്നു 2020 ഒക്ടോബര് അഞ്ചിന് സിദ്ദിഖ് കാപ്പനെ യു.പി പൊലീസ് അറസ്റ്റുചെയ്തത്. രാജ്യദ്രോഹം, സമുദായങ്ങള്ക്കിടയില് ശത്രുത വളര്ത്തല്, ഭീകരപ്രവര്ത്തനത്തിന് ഫണ്ട് സമാഹരിക്കല് തുടങ്ങിയ കുറ്റങ്ങളാണ് കാപ്പനെതിരെ ചുമത്തിയത്.