പിറവം: രാമമംഗലത്ത് ഒറ്റമുറി വീടിനുള്ളില്‍ ഉറങ്ങിക്കിടന്ന ഭാര്യയുടെയും നാലു മക്കളുടേയും ദേഹത്തേക്ക് ജനാലയിലൂടെ ആസിഡ് ഒഴിച്ചു പൊള്ളലേല്‍പ്പിച്ച സംഭവത്തില്‍ ഭര്‍ത്താവ് റെനിയെ പോലീസ് അറസ്റ്റ് ചെയ്തു. രാമമംഗലം നെയ്ത്തുശാലപ്പടിക്ക് സമീപം വാടകയ്ക്കു താമസിക്കുന്ന മുട്ടമലയില്‍ സ്മിത (40), മക്കളായ നെവിന്‍ (14), സ്മിജ (13), സിമ്ന (12), സിമ്നു (നാല്) എന്നിവരെയാണ് ആഡിസ് ഒഴിച്ച്‌ പൊള്ളലേല്‍പ്പിച്ചത്.
ഇതില്‍ സിമ്നയുടെ മുഖത്തും ശരീരത്തിന്‍റെ മറ്റുഭാഗങ്ങളിലും കാര്യമായ പൊള്ളലേറ്റിട്ടുണ്ട്. കുട്ടിയുടെ കണ്ണിന് കാഴ്ചയ്ക്കു തകരാര്‍ സംഭവിച്ചതായി ഡോക്ടര്‍മാര്‍ സംശയം പ്രകടിപ്പിച്ചതിനാല്‍ ഇന്ന് വിദഗ്ധ ചികിത്സയ്ക്കായി മാറ്റും. കോട്ടയം മെഡിക്കല്‍ കോളേജിലെ ഇഎസ്‌ഐ വിഭാഗത്തിലാണ് ഇവരെ പ്രവേശിപ്പിച്ചിരിക്കുന്നത്.
വ്യാഴാഴ്ച പുലര്‍ച്ചെ മൂന്നോടെയാണ് സംഭവം നടന്നതെന്ന് സ്മിത പറഞ്ഞു. ഇവിടെ ഒറ്റമുറിയുള്ള വാടക വീട്ടിലാണ് അഞ്ചംഗ കുടുംബം താമസിക്കുന്നത്. ജനലഴിയിടയിലൂടെ റെനി ആസിഡ് ഒഴിക്കുകയായിരുന്നുവെന്ന് പറയുന്നു. വെള്ളം ഒഴിച്ചതാണെന്നാണ് ആദ്യം കരുതിയത്. പിന്നീട് ശരീരം പൊള്ളുന്നതായി തോന്നിയപ്പോഴാണ് ആസിഡാണന്ന് മനസിലായത്. ജനലിന്‍റെ അടുത്ത് കിടന്നുറങ്ങുകയായിരുന്ന സിമ്നയുടെ ശരീരത്തിലേക്കാണ് കൂടുതലും ആസിഡ് വീണത്.
ഭര്‍ത്താവുമായി സ്വരച്ചേര്‍ച്ചയില്ലാത്തതിനാല്‍ നാലു മക്കളുമായി സ്മിത ഒറ്റയ്ക്കാണ് ജീവിക്കുന്നത്. ഇവരുടെ ദൈനംദിന ജീവിതത്തിലെ പ്രതിസന്ധികള്‍ മുന്നില്‍ കണ്ട് സാമൂഹ്യസേവന രംഗത്ത് പ്രവര്‍ത്തിക്കുന്ന സംഘടനകളും വ്യക്തികളും ചേര്‍ന്ന് ഇവര്‍ക്കായി സ്ഥലം വാങ്ങി വീട് നിര്‍മിച്ച്‌ നല്‍കാന്‍ നടപടി തുടങ്ങിയിരുന്നു. പിറവത്തിനടുത്ത് ഓണക്കൂറില്‍ നിര്‍മിക്കുന്ന വീടിന്‍റെ നിര്‍മാണ പ്രവര്‍ത്തനം പുരോഗമിക്കുകയാണ്.
