ന്യൂഡല്‍ഹി: വോട്ടെണ്ണലിന് നാലു ദിവസം മാത്രം ബാക്കി നില്‍ക്കെ കേന്ദ്രത്തില്‍ ബിജെപി ഇതരമുന്നണി ചര്‍ച്ചകള്‍ സജീവമാക്കാന്‍ നേതാക്കളെ ഓടിനടന്ന് കണ്ട് ടിഡിപി അധ്യക്ഷനും ആന്ധ്ര മുഖ്യമന്ത്രിയുമായ ചന്ദ്രബാബു നായിഡു. ഞയാറാഴ്ച രാവിലെ കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുമായി അദ്ദേഹം വീണ്ടും ചര്‍ച്ച നടത്തി. ശനിയാഴ്ചയും നായിഡു രാഹുലുമായി ചര്‍ച്ച നടത്തിയിരുന്നു.
എന്‍സിപി അധ്യക്ഷന്‍ ശരത് പവാറിനെയും നായിഡു കണ്ടു. വൈകിട്ട് യുപിഎ അധ്യക്ഷ സോണിയ ഗാന്ധിയെയും സന്ദര്‍ശിക്കുമെന്നാണ് വിവരം. കഴിഞ്ഞ ദിവസം ലക്നോവില്‍ എത്തി സമാജ്‌വാദി പാര്‍ട്ടി നേതാവ് അഖിലേഷ് യാദവുമായും ബിഎസ്പി നേതാവ് മായാവതിയുമായും നായിഡു കൂടിക്കാഴ്ച നടത്തിയിരുന്നു. അഖിലേഷും മായാവതിയും തിങ്കളാഴ്ച ഡല്‍ഹിയില്‍ എത്തുന്നുണ്ട്.
മോദിയെയും ബിജെപിയെയും അധികാരത്തില്‍നിന്നു പുറത്താക്കി പ്രതിപക്ഷ ഐക്യം രൂപീകരിക്കുകയാണ് നായിഡുവിന്‍റെ ലക്ഷ്യം. തെരഞ്ഞെടുപ്പു ഫലം പുറത്തു വന്നതിനുശേഷം ബിജെപിയെ അധികാരത്തില്‍നിന്നു മാറ്റിനിര്‍ത്തി ബിജെപി വിരുദ്ധ മുന്നണി രൂപീകരിക്കുന്നതിനുള്ള ചര്‍ച്ചകളാണ് നടന്നത്.
