പത്തുവയസുകാരിയായ മകളെ മാനഭംഗപ്പെടുത്തുമെന്ന് ട്വീറ്ററിലൂടെ ഭീഷണി മുഴക്കിയ ആള്‍ക്കെതിരെ കോണ്‍ഗ്രസ് വക്താവ് പ്രിയങ്ക ചതുര്‍വേദി പോലീസില്‍ പരാതി നല്‍കി. ഈ രീതിയിലുള്ള പെരുമാറ്റം പ്രതീക്ഷിച്ചിരുന്നില്ല. ശക്തമായ നടപടി സ്വീകരിക്കാമെന്ന് മുംബൈ പോലീസ് ഉറപ്പ് നല്‍കിയതായും പ്രിയങ്ക പറഞ്ഞു.മധ്യപ്രദേശില്‍ ഏഴു വയസ്സുകാരിയെ മാനഭംഗപ്പെടുത്തിയ കേസിലെ പ്രതികളെ താന്‍ അനുകൂലിച്ചുവെന്നുള്ള വ്യാജപ്രചാരണം നടക്കുന്നുണ്ട്. അതിന്റെ തുടര്‍ച്ചയായിട്ടായിരിക്കാം മകള്‍ക്ക് നേരെ ഭീഷണി ഉയര്‍ന്നതെന്ന് അവര്‍ പറഞ്ഞു. സ്ത്രീകള്‍ക്കു നേരേ വര്‍ദ്ധിച്ചു വരുന്ന ഇത്തരം ഭീഷണികള്‍ക്കു നേരേ ബിജെപി കണ്ണടയ്ക്കുന്നു. അത് ശരിയായ നടപടിയല്ലെന്ന് കോണ്‍ഗ്രസ് നേതാവ് പറഞ്ഞു.
ശ്രീരാമന്‍റെ മുഖചിത്രമുള്ള @GirishK1605 എന്ന ട്വിറ്റര്‍ അക്കൗണ്ടില്‍ നിന്നാണ് ഭീഷണി വന്നതെന്നാണ് പരാതി. കോണ്‍ഗ്രസ് നേതാവ് പരാതി നല്‍കിയതോടെ ഈ അക്കൗണ്ട് അപ്രത്യക്ഷമായി.
