യുഎസ് ഓപ്പണ് ഗ്രാന്ഡ് പ്രീ ബാഡ്മിന്റണില് ഇന്ത്യയുടെ മലയാളി താരം എച്ച്.എസ്. പ്രണോയിക്ക് കിരീടം. ഫൈനലില് ഇന്ത്യന് താരമായ പി. കശ്യപിനെ തകര്ത്താണ് പ്രണോയ് കിരീടം നേടിയത്. മൂന്ന് ഗെയിം നീണ്ട വാശിയേറിയ പോരാട്ടത്തിനൊടുവിലായിരുന്നു പ്രണോയി വിജയം കണ്ടത്. സ്കോര്: 21-15, 20-22, 21-12.
ആദ്യ ഗെയിമില് 6-1ന് മുന്നിലായിരുന്നു കശ്യപ്. എന്നാല് തിരിച്ചടിച്ച പ്രണോയി 12-12ന് ഒപ്പമെത്തി. പിന്നീട് മൂന്ന് പോയിന്റുകൂടി വിട്ടുകൊടുത്തശേഷം 21-15ന് പ്രണോയ് ആദ്യ ഗെയിം സ്വന്തമാക്കി.
രണ്ടാം ഗെയിം കൂടുതല് ആവേശം നിറഞ്ഞതായിരുന്നു. 9-7ന് മുന്നിലെത്തിയ കശ്യപ് പിന്നീട് 14-10ന്റെ ലീഡ് നേടി. പക്ഷേ വിട്ടുകൊടുക്കാന് തയ്യാറാകാതിരുന്ന പ്രണോയ് 18-18ന് ഒപ്പം പിടിച്ചു. എന്നാല് അവസാന വിജയം കശ്യപിനൊപ്പമായിരുന്നു. 22-20ന് കശ്യപ് ഗെയിം സ്വന്തമാക്കിയതോടെ മത്സരം മൂന്നാം ഗെയിമിലേക്ക് നീണ്ടു.
മൂന്നാം ഗെയിമില് കശ്യപ് സ്വയം തെറ്റുകള് വരുത്തിയതോടെ പ്രണോയ് തുടക്കത്തില് തന്നെ 7-3ന്റെ ലീഡ് നേടി. മികച്ച ഷോട്ടുമായി മുന്നേറിയ പ്രണോയ് 15-8ന്റെ മുന്തൂക്കത്തിലെത്തി. പിന്നീട് നാല് പോയിന്റുകള് മാത്രം വിട്ടുകൊടുത്ത് 21-12ന് പ്രണോയി മത്സരവും കിരീടവും സ്വന്തമാക്കി.
പ്രണോയിയുടെ കരിയറിലെ മൂന്നാം ഗ്രാന്ഡ് പ്രി കിരീടമാണിത്. 2014-ല് ഇന്തോനേഷ്യന് മാസ്റ്റേഴ്സും 2016-ല് സ്വിസ് ഒാപ്പണും പ്രണോയ് നേടിയിട്ടുണ്ട്. 2014-ല് വിയറ്റ്നാം ഒാപ്പണിന്റെ ഫൈനലില്തോറ്റു.