ന്യൂഡല്‍ഹി: പ്രധാനമന്ത്രി നരേന്ദ്ര മോദി ഭരണഘടനാ സ്ഥാപനങ്ങളെ നശിപ്പിക്കുകയാണെന്ന് മുന്‍ പ്രധാനമന്ത്രി മന്‍മോഹന്‍ സിംഗ്. ന്യൂഡല്‍ഹിയില്‍ കോണ്‍ഗ്രസ് എംപി ശശി തരൂരിന്‍റെ പാരഡോക്സിക്കല്‍ പ്രൈം മിനിസ്റ്റര്‍ എന്ന പുസ്തകത്തിന്‍റെ പ്രകാശനം നിര്‍വഹിച്ചു സംസാരിക്കവെയാണ് അദ്ദേഹം മോദിക്കെതിരേ നിശിത വിമര്‍ശനമുയര്‍ത്തിയത്.
2014-ല്‍ പ്രധാനമന്ത്രിയായി മോദി ചുമതലയേല്‍ക്കുന്പോള്‍ അദ്ദേഹം ജനങ്ങള്‍ക്കു ധാരാളം വാഗ്ദാനങ്ങള്‍ നല്‍കിയിരുന്നു. എന്നാല്‍ കഴിഞ്ഞ നാലു വര്‍ഷത്തെ ഭരണത്തിലൂടെ മോദിയും അദ്ദേഹത്തിന്‍റെ സര്‍ക്കാരും ജനാധിപത്യത്തെയും ജനങ്ങളുടെ വിശ്വാസത്തെയും തകര്‍ത്തു. അദ്ദേഹം രാജ്യത്തിന്‍റെ പ്രധാനമന്ത്രിയാണ്. പക്ഷേ, വര്‍ഗീയ കലാപങ്ങള്‍, ആള്‍ക്കൂട്ട കൊലപാതകം, പശുവിന്‍റെ പേരിലുള്ള അക്രമങ്ങള്‍ എന്നിവയോട് അദ്ദേഹം നിശബ്ദത പാലിച്ചു- മന്‍മോഹന്‍ സിംഗ് പറഞ്ഞു.
നമ്മുടെ സര്‍വകലാശാലകളിലെയും സിബിഐ ഉള്‍പ്പെടെയുള്ള ഭരണഘടനാ സ്ഥാപനങ്ങളിലെയും അവസ്ഥ മലിനപ്പെടുത്തിയെന്നും സിബിഐ തലപ്പത്തെ തമ്മിലടി ചൂണ്ടിക്കാട്ടി മന്‍മോഹന്‍ കുറ്റപ്പെടുത്തി.
