നിമിഷ പ്രിയ വിഷയത്തില് സാധ്യമായതെല്ലാം ചെയ്യുമെന്ന് വ്യക്തമാക്കി കേന്ദ്രസര്ക്കാര്. യെമനിലെ ജയിലില് കഴിയുന്ന നിമിഷപ്രിയയുടെ വധശിക്ഷ നടപ്പിലാക്കാന് യെമന് പ്രസിഡന്റ് അനുമതി നല്കിയതിന് പിന്നാലെ കേന്ദ്രസര്ക്കാറിൻ്റെ പ്രതികരണം.
നിമിഷ പ്രിയയ്ക്ക് വേണ്ടി കുടുംബം നടത്തിവരുന്ന ശ്രമങ്ങള് അറിയാമെന്നും കുടുംബത്തിന് പിന്തുണ നല്കുമെന്നും വിദേശകാര്യ മന്ത്രാലയം അറിയിച്ചു. കഴിഞ്ഞ ദിവസമാണ് വധശിക്ഷക്ക് യെമന് പ്രസിഡന്റ് അനുമതി നല്കിയത്. നിമിഷ പ്രിയയുടെ വധശിക്ഷ ഒരു മാസത്തിനകം നടപ്പാക്കാനാണ് ഉത്തരവ്.
യെമന് പൗരനെ കൊലപ്പെടുത്തിയ കേസിലാണ് പാലക്കാട് കൊല്ലങ്കോട് സ്വദേശിയായ നിമിഷപ്രിയയ്ക്ക് വധശിക്ഷ വിധിച്ചിരിക്കുന്നത്. 2017ലാണ് യെമന് പൗരനായ തലാല് അബ്ദുമഹ്ദി കൊല്ലപ്പെട്ടത്.
ശേഷം അബ്ദുമഹ്ദിയുടെ കുടുംബത്തെ നേരില്കണ്ട് മോചനം സാധ്യമാക്കാന് നിമിഷപ്രിയയുടെ കുടുംബം ശ്രമിച്ചിരുന്നെങ്കിലും ഫലം കണ്ടിരുന്നില്ല. അബ്ദുമഹ്ദി ഉള്പ്പെടുന്ന ഗോത്രത്തിന്റെ തലവന്മാരുമായും ചര്ച്ചകള് നടത്തിയിരുന്നെങ്കിലും അതും ഫലം കാണാതെ വന്നതോടെയാണ് ശിക്ഷ നടപ്പാക്കുന്നത്.
