സിയൂള്‍: ദക്ഷിണ കൊറിയന്‍ പൗരനെ വെടിവെച്ചുകൊന്ന നടപടിയില്‍ മാപ്പ് പറഞ്ഞ് ഉത്തര കൊറിയന്‍ ഭരണാധികാരി കിം ജോംഗ് ഉന്‍. അതിര്‍ത്തി കാര്യങ്ങള്‍ കൈകാര്യം ചെയ്യുന്ന യൂണൈറ്റഡ് ഫ്രണ്ട് ഡിപ്പാര്‍ട്ട്മെന്‍റ് ദക്ഷിണ കൊറിയന്‍ പ്രസിഡന്‍റ് മൂണ്‍ ജെ ഇന്നിനയച്ച കത്തിലാണ് ഉന്നിന്‍റെ ഖേദപ്രകടനം.
ഒരിക്കലും സംഭവിക്കാന്‍ പാടില്ലാത്ത കാര്യമാണ് തങ്ങളുടെ സമുദ്രാതിര്‍ത്തിയില്‍ ഉണ്ടായത്. കോവിഡ് വ്യാപനം തടയുന്നതിന്‍റെ ഭാഗമായുള്ള നടപടിയില്‍ ദക്ഷിണ കൊറിയന്‍ പൗരന്‍ കൊല്ലപ്പെട്ടതില്‍ കിം ജോംഗ് ഉന്‍ ഖേദിക്കുന്നതായും കത്തില്‍ വ്യക്തമാക്കി. തങ്ങളുടെ ഉദ്യോഗസ്ഥനെ ഉത്തരകൊറിയന്‍ സൈന്യം വെടിവെച്ചു കൊന്നശേഷം കത്തിച്ചെന്ന് ദക്ഷിണ കൊറിയ കഴിഞ്ഞദിവസം വ്യക്തമാക്കിയതിനു പിന്നാലെയാണ് ഉത്തര കൊറിയയുടെ ഭാഗത്തുനിന്നും അപൂര്‍വമായ നടപടി.
ഉത്തര കൊറിയന്‍ അതിര്‍ത്തിയില്‍നിന്ന് ആറ് മൈല്‍ മാറി കടലില്‍ പട്രോളിംഗ് നടത്തിയിരുന്ന ഫിഷറീസ് ഉദ്യോഗസ്ഥനെ ക്രൂരമായി കൊലപ്പെടുത്തിയെന്നായിരുന്നു ദക്ഷിണ കൊറിയയുടെ ആരോപണം. ഉത്തര കൊറിയന്‍ സൈന്യം പിടിച്ചുകൊണ്ടുപോയ ഇദ്ദേഹത്തെ ചോദ്യം ചെയ്യലിനുശേഷം വെടിവെച്ചു കൊലപ്പെടുത്തി. പിന്നീട് പെട്രോള്‍ ഒഴിച്ച്‌ കത്തിക്കുകയായിരുന്നു.
