ന്യൂഡല്‍ഹി: ദേശിയ ചലചിത്ര പുരസ്കാര വിതരണം പ്രതിസന്ധിയില്‍. രാഷ്ട്രപതി പുരസ്കാരം നല്‍കിയില്ലെങ്കില്‍ ബഹിഷ്കരിക്കുമെന്ന് ജേതാക്കള്‍ വ്യക്തമാക്കി. 11 പുരസ്കാരങ്ങള്‍ മാത്രം രാഷ്ട്രപതി വിതരണം ചെയ്യാനുള്ള തീരുമാനത്തിനെതിരെയാണ് ജേതാക്കള്‍ രംഗത്തെത്തിയിരിക്കുന്നത്.
മന്ത്രി സ്മൃതി ഇറാനിയാണ് മറ്റു ജേതാക്കള്‍ക്കു പുരസ്കാരം വിതരണം ചെയ്യുന്നത്. സ്മൃതി ഇറാനിയുടെ നീക്കത്തിനെതിരേ പുരസ്കാര ജേതാക്കള്‍ പ്രതിഷേധം ശക്തമാക്കിയിരിക്കുകയാണ്. പുരസ്കാരവിതരണം ബഹിഷ്കരിക്കാന്‍ രാവിലെ ചേര്‍ന്ന ജേതാക്കളുടെ യോഗമാണ് തീരുമാനിച്ചത്. ഇതു സംബന്ധിച്ച പരാതി വാര്‍ത്താവിതരണമന്ത്രാലയത്തിനു നല്‍കാനാണ് തീരുമാനം. അറുപതോളം കലാകാരന്‍മാര്‍ ഒപ്പിട്ട പരാതിയാണ് മന്ത്രാലയത്തിനു നല്‍കുന്നത്. എല്ലാ അവാര്‍ഡുകളും രാഷ്ട്രപതി തന്നെ വിതരണം ചെയ്യണമെന്നാണ് പുരസ്കാര ജേതാക്കള്‍ ആവശ്യമുന്നയിച്ചത്.
