ഗൗതം രാമചന്ദ്രന്‍ സംവിധാനംചെയ്യുന്ന നിവിന്‍ പോളിയുടെ ആദ്യത്തെ തമിഴ് ചിത്രം റിച്ചി ഡിസംബര്‍ എട്ടിന് പ്രദര്‍ശനത്തിനെത്തുന്നു. നിവിനും തമിഴ്താരം നാട്ടിയുമാണ് ചിത്രത്തിലെ പ്രധാന കഥാപാത്രങ്ങള്‍. ലോക്കല്‍ റൗഡിയായ റിച്ചിയായാണ് നിവിന്‍ ചിത്രത്തിലെത്തുന്നത്. ബോട്ട് മെക്കാനിക്കായി നാട്ടിയും എത്തുന്നു. തീരദേശത്തു ജീവിക്കുന്ന ഈ സുഹൃത്തുക്കള്‍ക്കിടയിലുണ്ടാകുന്ന സംഭവങ്ങള്‍ അവരുടെ സൗഹൃദത്തിലും ചുറ്റുപാടുകളിലും സൃഷ്ടിക്കുന്ന സ്വാധീനവും അതുണ്ടാകുന്ന പ്രശ്നങ്ങളുമാണ് റിച്ചി എന്ന സിനിമയില്‍ ദൃശ്യവത്കരിക്കുന്നത്. കന്നടയില്‍ സൂപ്പര്‍ഹിറ്റായ “ഉള്ളിടവരു കണ്ടാന്തെ’ എന്ന ചിത്രത്തിന്‍റെ തമിഴ് പതിപ്പാണ് റിച്ചി.
തെന്നിന്ത്യന്‍ താരം പ്രകാശ് രാജും ഒരു പ്രധാനവേഷത്തിലെത്തുന്നു. ഒരു വൈദികന്‍റെ വേഷമാണ് അദ്ദേഹത്തിന്. ശ്രദ്ധ ശ്രീനാഥ് ആണ് നായിക. രാജ് ഭരത്, ലക്ഷ്മി പ്രിയ, ചന്ദ്രമൗലി എന്നിവര്‍ മറ്റു വേഷങ്ങളിലെത്തുന്നു.
കാസ്റ്റ് ആന്‍ഡ് ക്രൂ, യേസ് സിനിമ എന്നിവയുടെ ബാനറില്‍ ആനന്ദ് പയ്യന്നൂര്‍, വിനോദ് ഷൊര്‍ണൂര്‍ എന്നിവര്‍ ചേര്‍ന്നാണ് റിച്ചി നിര്‍മിക്കുന്നത്. ട്രീസന്‍റ് ആര്‍ട്സിന്‍റെ ബാനറില്‍ വിക്രം വേദ, അവള്‍, അറാം എന്നീ ചിത്രങ്ങള്‍ പ്രദര്‍ശനത്തിനെത്തിച്ച രവീന്ദ്രനാണ് റിച്ചിയും തിയറ്ററിലെത്തിക്കുന്നത്. തൂത്തുക്കുടി, കുറ്റാലം, മണ്ണപ്പാട്ടി എന്നിവിടങ്ങളിലായി ചിത്രീകരിച്ച റിച്ചിയുടെ ഛായാഗ്രഹണം പാണ്ടികുമാര്‍ നിര്‍വഹിച്ചിരിക്കുന്നു. അജനീഷ് ലോകനാഥാണ് സംഗീതമൊരുക്കിയിരിക്കുന്നത്.
