ന്യൂഡല്ഹി: കോവിഡ് പോരാട്ടത്തില് ജാഗ്രത നിലനിര്ത്തണമെന്ന് ഓര്മപ്പെടുത്തി പ്രധാനമന്ത്രി നരേന്ദ്ര മോദി. ചെറിയ അനാസ്ഥപോലും കോവിഡ് പോരാട്ടത്തെ ദുര്ബലപ്പെടുത്തുമെന്ന് അദ്ദേഹം പറഞ്ഞു. കോവിഡ് മരണങ്ങള് വര്ധിക്കുന്നതില് പ്രധാനമന്ത്രി ദുഖം രേഖപ്പെടുത്തുകയും ചെയ്തു.
രാജ്യത്തെ കോവിഡ് കേസുകള് കുതിച്ചുയരുന്ന സാഹചര്യം ചര്ച്ച ചെയ്യാന് വിളിച്ച മുഖ്യമന്ത്രിമാരുടെ യോഗത്തില് സംസാരിക്കുകയായിരുന്നു അദ്ദേഹം. മിക്കവാറും എല്ലാ ഓഫീസുകളും ഇപ്പോള് പ്രവര്ത്തിച്ചുതുടങ്ങി. ആളുകള് റോഡിലും മാര്ക്കറ്റിലും ഉണ്ട്. ചെറിയ അശ്രദ്ധപോലും കോവിഡ് പോരാട്ടത്തെ ദുര്ബലപ്പെടുത്തും- പ്രധാനമന്ത്രി ചൂണ്ടിക്കാട്ടി.
മറ്റ് രാജ്യങ്ങളെ അപേക്ഷിച്ച് ഇന്ത്യയില് മരണനിരക്ക് കുറവാണ്. ഓരോ പൗരന്റേയും ജീവന് രക്ഷിക്കാനാണ് സര്ക്കാര് ശ്രമിക്കുന്നത്. മാര്ഗനിര്ദേശങ്ങള് പാലിച്ചില്ലെങ്കില് ഇതുവരെയുണ്ടാക്കിയ നേട്ടം ഇല്ലാതാകും. മാസ്ക് ധരിക്കുന്നതിലും സാമൂഹിക ഏഅകലം പാലിക്കുന്നതിലും വീഴ്ചവരുത്തരുത്. കോവിഡ് വ്യാപനം തടഞ്ഞാല് മാത്രമേ തൊഴില് അവസരങ്ങള് വര്ധിപ്പിക്കാന് സാധിക്കൂവെന്നും പ്രധാനമന്ത്രി പറഞ്ഞു.