ഗാസിയാബാദ്: ഉത്തര്‍പ്രദേശിലെ ഗാസിയാബാദില്‍ മാധ്യമപ്രവര്‍ത്തകന് വെടിയേറ്റ സംഭവത്തില്‍ യോഗി സര്‍ക്കാരിനെ നിശിതമായി വിമര്‍ശിച്ച്‌ പ്രിയങ്ക ഗാന്ധി. ട്വിറ്ററിലൂടെയാണ് പ്രിയങ്ക വിമര്‍ശനമുന്നയിച്ചത്.
“അനന്തരവളെ ശല്യം ചെയ്തതിന് പൊലീസില്‍ പരാതി നല്‍കിയതിനാണ് ഒരു മാധ്യമപ്രവര്‍ത്തകന് വെടിയേറ്റത്. ഈ ജംഗിള്‍ രാജില്‍ സാധാരണക്കാരന്‍ എങ്ങനെ സുരക്ഷിതനാകും?’- പ്രിയങ്ക കുറിച്ചു.
കഴിഞ്ഞ ദിവസം ഇദ്ദേഹത്തിന്‍റെ ബന്ധുവായ പെണ്‍കുട്ടിയെ ഒരു സംഘമാളുകള്‍ ആക്രമിച്ചിരുന്നു. തുടര്‍ന്ന് വിക്രം ജോഷി ഇവര്‍ക്കെതിരെ പോലീസില്‍ പരാതി നല്‍കി. ഇതിന്‍റെ തൊട്ടടുത്ത ദിവസമാണ് സംഭവം നടന്നത്.
തിങ്കളാഴ്ച രാത്രി പെണ്‍മക്കളോടൊപ്പം ബൈക്കില്‍ സഞ്ചരിക്കവെയാണ് മാധ്യമപ്രവര്‍ത്തകനായ വിക്രം ജോഷിയെ ഒരു സംഘമാളുകള്‍ വെടിവച്ചു കൊലപ്പെടുത്താന്‍ ശ്രമിച്ചത്. പെണ്‍മക്കള്‍ക്കൊപ്പം ബൈക്കില്‍ സഞ്ചരിക്കുകയായിരുന്ന ജോഷിയെ അക്രമികള്‍ ആക്രമിക്കുകയും വെടി വയ്ക്കുകയുമായിരുന്നു.
