മട്ടന്നൂര്: മാലൂരില് ഓട്ടോറിക്ഷ ഡ്രൈവറെ കരിങ്കല് ക്വാറിയില് ദുരൂഹ സാഹചര്യത്തില് മരിച്ച നിലയില് കണ്ടെത്തി. നിട്ടാറമ്ബിലെ കരിയട്ടയില് വീട്ടില് കോരമ്പത്ത് സജീഷിനെ (28)യാണ് മരിച്ച നിലയില് കണ്ടെത്തിയത്. മാലൂര് തൃക്കടാരിപ്പൊയില് ടൗണില് നിന്നു ഓട്ടോയോടിക്കുന്ന സജീഷിന്റെ മൃതദേഹം രാവിലെ എട്ടരയോടെയാണ് ചിത്രവട്ടം കൂവ്വക്കരയിലെ കരിങ്കല് ക്വാറിയില് കണ്ടത്.
തിങ്കളാഴ്ച രാത്രി ഓട്ടം കഴിഞ്ഞ് വീട്ടിലെത്താതെ വന്നതോടെ രാവിലെയാണ് ബന്ധുക്കള് സജീഷിനെ കാണാനില്ലെന്ന് കാണിച്ചു മാലൂര് പോലീസില് പരാതി നല്കിയത്. ബന്ധുക്കളും പോലീസും തെരച്ചില് നടത്തുന്നതിനിടെയാണ് മൃതദേഹം കരിങ്കല് ക്വാറിയില് കണ്ടെത്തിയത്. മൃതദേഹം പാറക്കല്ലുകള്ക്ക് മുകളിലായിരുന്നു. സജീഷിന്റെ ഓട്ടോ ക്വാറിയില് നിര്ത്തിയിട്ട നിലയിലായിരുന്നു.
സംഭവമറിഞ്ഞ് പേരാവൂര് സിഐ കുട്ടികൃഷ്ണന്, മാലൂര് എസ്ഐ ഷിജു എന്നിവരുടെ നേതൃത്വത്തിലെത്തിയ പോലീസ് പരിശോധന നടത്തി. കണ്ണൂരില് നിന്നു ഫോറന്സിക് വിഗ്ധരും വിരളടയാള വിഗ്ദ്ധരും ഡോഗ് സ്ക്വാഡും സ്ഥത്തെത്തി പരിശോധന നടത്തി. സംഭവമറിഞ്ഞ് നൂറ് കണക്കിനാളുകളാണ് ക്വാറിയില് തടിച്ചു കൂടിയത്. ബാലന്-രാധ ദമ്പതികളുടെ മകനാണ് അവിവാഹിതനായ സജീഷ്. സഹോദരങ്ങള് ബിനീഷ്, റജീഷ്. ഇന്ക്വസ്റ്റ് നടത്തിയ മൃതദേഹം ഉച്ചയോടെ പോസ്റ്റ്മോര്ട്ടത്തിനായി പരിയാരം മെഡിക്കല് കോളജിലേക്ക് മാറ്റി.