മലയിന്‍കീഴ്‌: കാട്ടാക്കട മണ്ഡലത്തിലെ ദുരിതയാത്രയ്‌ക്ക് അടുത്തെങ്ങും പരിഹാരമാവില്ല. സംസ്‌ഥാനപാതകളടക്കം മണ്ഡലത്തിലെ 33 റോഡുകളാണു തകര്‍ന്നടിഞ്ഞുകിടക്കുന്നത്‌.
കുണ്ടമണ്‍കടവ്‌-മണ്ഡപത്തിന്‍കടവ്‌ റോഡ്‌, കാട്ടാക്കട-നെയ്യാറ്റിന്‍കര റോഡ്‌, മൂലക്കോണം-ബാലരാമപുരം റോഡ്‌, ഊരൂട്ടമ്പലം- പ്രാവച്ചമ്പലം റോഡ്‌, മാറനല്ലൂര്‍- ചീനിവിള- അണപ്പാട്‌ റോഡ്‌, മാറനല്ലൂര്‍-പുന്നാവൂര്‍ റോഡ്‌ എന്നിവയുടെ നവീകരണത്തിനു കോടികളുടെ വികസന പദ്ധതി പ്രഖ്യാപിച്ചിട്ടു മാസങ്ങളായി.
ദുരിതയാത്രയുടെ നേര്‍ക്കാഴ്‌ചയായി കാട്ടാക്കട മണ്ഡലത്തിലെ റോഡുകള്‍ മാറിക്കഴിഞ്ഞു. നിയമസഭാ തെരഞ്ഞെടുപ്പിനു മാസങ്ങളും തദ്ദേശ തെരഞ്ഞെടുപ്പിന്‌ ആഴ്‌ചകളും ശേഷിക്കെ ദുരിതയാത്രയുടെ പ്രതിഷേധം പൊതുസമൂഹത്തില്‍ ആര്‍ത്തിരമ്പുന്നത്‌ ഭരണകക്ഷിയുടെ പ്രാദേശിക പ്രവര്‍ത്തകരേയും ആശങ്കയിലാക്കിയിട്ടുണ്ട്‌.
