അമ്പലമുക്ക് വിനീത കൊലക്കേസ് പ്രതി രാജേന്ദ്രന് വധശിക്ഷ.കേസിൽ രാജേന്ദ്രൻ കുറ്റക്കാരനാണെന്ന് കഴിഞ്ഞദിവസം കോടതി വിധിച്ചിരുന്നു. പ്രതി ചെയ്ത കുറ്റം അപൂർവങ്ങളിൽ അപൂർവം എന്ന് പ്രോസീക്യൂഷൻ കഴിഞ്ഞ ദിവസം കോടതിയിൽ പറഞ്ഞിരുന്നു.
പ്രതിക്ക് പരമാവധി ശിക്ഷ നൽകണമെന്നും പ്രോസീക്യൂഷൻ അവശ്യപ്പെട്ടിരുന്നു. തമിഴ്നാട് കന്യാകുമാരി ജില്ലയിലെ തോവാള വെള്ളമടം രാജീവ് നഗർ സ്വദേശി രാജേന്ദ്രനാണ് കേസിലെ ഏക പ്രതി. ദൃക്സാക്ഷികള് ഇല്ലാതിരുന്ന കേസില് സൈബർ ഫോറൻസിക് തെളിവുകളും, സാഹചര്യ തെളിവുകളെയും മാത്രം ആശ്രയിച്ച പ്രോസിക്യൂഷന് 96 പേരെ സാക്ഷികളായി വിസ്തരിക്കുകയായിരുന്നു.
രണ്ട് വര്ഷം മുമ്പ് ഭര്ത്താവ് ഹൃദ്രോഗബാധിതനായി മരിച്ചതിനെ തുടര്ന്ന് ജീവിക്കാന് മറ്റ് മാര്ഗം ഇല്ലാതെ വന്നപ്പോഴാണ് വിനീത പേരൂര്ക്കടയിലെ അലങ്കാര ചെടി വില്പന ശാലയില് ജോലിക്ക് വന്ന് തുടങ്ങിയത്. കൊല്ലപ്പെടുന്നതിന് ഒമ്പത് മാസം മുമ്പാണ് ഇവിടെ ജോലിക്ക് എത്തിയത്.സമ്പൂര്ണ കോവിഡ് നിയന്ത്രണങ്ങള് ഉണ്ടായിരുന്ന ദിവസം ചെടികള് നനയ്ക്കുന്നതിനാണ് ഫെബ്രുവരി ആറിന് സുനിത കടയിലെത്തിയത്. ചെടി വാങ്ങാന് എന്ന വ്യാജേന കടയിലെത്തിയ രാജേന്ദ്രന് ചെടികള് കാണിച്ചു കൊടുത്ത വിനീതയെ പുറകില് നിന്ന് വട്ടം ചുറ്റി പിടിച്ച് കഴുത്തില് കത്തി കുത്തി ഇറക്കുകയായിരുന്നു.
ഇരക്ക് നിലവിളിക്കാന് പോലും കഴിയാത്തവിധം സ്വനപേടകത്തില് ആഴത്തില് മുറിവ് ഉണ്ടാക്കുന്നതാണ് രാജേന്ദ്രന്റെ കൊലപാതക രീതി. വിനീതയെ കൊലപ്പെടുത്തിയ ശേഷം തമിഴ്നാട്ടിലെ കാവല് കിണറിന് സമീപത്തെ ലോഡ്ജിൽ ഒളിവില് കഴിഞ്ഞിരുന്ന പ്രതിയെ ഫെബ്രുവരി 11 ന് പേരുർക്കട സിഐവി സജികുമാറിന്റെ നേതൃത്വത്തിലുള്ള പൊലീസ് സംഘം കസ്റ്റഡിയിലെടുക്കുകയായിരുന്നു.
