അമീബിക് മസ്തിഷ്ക ജ്വരത്തിനുള്ള മരുന്ന് ഇന്ന് ജര്മനിയില് നിന്ന് തിരുവനന്തപുരത്തെത്തും. ജീവന് രക്ഷാ മരുന്നായ മില്റ്റിഫോസിന് ആണ് എത്തിക്കുന്നത്. കൂടുതല് ബാച്ച് മരുന്നുകള് വരും ദിവസങ്ങളില് എത്തിക്കാനും നടപടികളായിട്ടുണ്ട്.
നേരത്തെ, അമീബിക് മെനിഞ്ചോ എന്സെഫലൈറ്റിസ് ബാധിച്ച് കോഴിക്കോട് ബേബി മെമ്മോറിയല് ആശുപത്രിയില് ചികിത്സയിലായിരുന്ന 14 വയസുകാരന്റെ ജീവന് രക്ഷിക്കാന് കഴിഞ്ഞിരുന്നു.
രോഗം നേരത്തെ തിരിച്ചറിയാന് സാധിച്ചതാണ് കുട്ടിയെ രക്ഷിക്കാന് സഹായിച്ചതെന്ന് ഡോ.അബ്ദുള് റൗഫ് പറഞ്ഞു. ജര്മനിയില് നിന്നുള്ള മരുന്ന് ആരോഗ്യ വകുപ്പ് എത്തിച്ചു നല്കിയെന്നും അത് കുട്ടിക്ക് നല്കിയെന്നും അദ്ദേഹം കൂട്ടിച്ചേര്ത്തു.
