കുട്ടനാട്ടില് കനത്ത മഴയെ തുടര്ന്ന് താഴ്ന്ന പ്രദേശങ്ങള് വെള്ളത്തിനടിയിലായി. കൈനകരി, വേഴപ്ര, മാമ്പുഴക്കരി മേഖലകളിലെ നിരവധി വീടുകളില് വെള്ളക്കെട്ട് രൂപപ്പെട്ടു. ആറുമാസമായി തുടര്ച്ചയായി വീടുകളില് വെള്ളം കയറുകയാണെന്നും മഴ കുറഞ്ഞാലും വെള്ളക്കെട്ട് ഒഴിയുന്നില്ലെന്നും പ്രദേശവാസികള് പറയുന്നു.
കനത്ത മഴയില് തിരുവനന്തപുരം വിഴിഞ്ഞത്ത് വ്യാപക നാശനഷ്ടമുണ്ടായി. മഴയിലും കടല്ക്ഷോഭത്തിലും മുപ്പതിലധികം വള്ളങ്ങള് തകര്ന്നു. മത്സ്യബന്ധന ഉപകരണങ്ങള്ക്കും കേടുപാടുകള് സംഭവിച്ചു. ഗംഗയാര് കരകവിഞ്ഞതോടെ അമ്പതോളം കടകളില് വെള്ളം കയറി. തീരപ്രദേശങ്ങളിലെ വീടുകളില് നിന്ന് ആളുകളെ മാറ്റിപ്പാര്പ്പിക്കുകയാണ്.