ഉരുള്പൊട്ടല് ദുരന്തത്തില് കാണാത്തവര്ക്കായുള്ള തെരച്ചില് ആറാം ദിവസവും തുടരും. 1,264 പേര് ആറ് സംഘങ്ങളായി മുണ്ടക്കൈ, ചൂരല്മല, പുഞ്ചിരിമുട്ടം ഉള്പ്പെടെയുള്ള സ്ഥലങ്ങളില് തെരച്ചില് നടത്തും. മൃതദേഹങ്ങള് കണ്ടെത്താന് സൈന്യം കൊണ്ടുവരുന്ന റഡാറുകള് ഇന്ന് പ്രദേശത്ത് ഉപയോഗിക്കും
രക്ഷാപ്രവര്ത്തകരെ ഒറ്റയ്ക്ക് വിടാതെ വിവിധ ഗ്രൂപ്പുകളായി തിരിച്ചായിരിക്കും ഇന്നത്തെ തെരച്ചില്. ചൂരല്മലയിലെ ബെയിലി പാലത്തിന് സമീപത്ത് വെച്ച് സൈന്യമായിരിക്കും രക്ഷാപ്രവര്ത്തകരെ വിവിധ സംഘങ്ങളായി തിരിച്ചശേഷം ദുരന്തമേഖലയിലേക്ക് കടത്തിവിടുക. ചാലിയാറില് ഇന്ന് രാവിലെ ഏഴ് മണിയോടെ രണ്ട് ഭാഗങ്ങളായി തെരച്ചില് പുനരാരംഭിക്കും. ചാലിയാറിലെ തെരച്ചിലും തിങ്കളാഴ്ചയോടെ അവസാനിപ്പിക്കും. ചാലിയാറില് നിന്ന് ഇന്നലെ കണ്ടെത്തിയത് 12 മൃതദേഹങ്ങളാണ്. ഇതോടെ ചാലിയാറില് വിപുലമായ തെരച്ചില് നടത്താനാണ് തീരുമാനം.
