വടകര സജീവന്റെ മരണത്തില് പ്രതികളായ പൊലീസ് ഉദ്യോഗസ്ഥര്ക്ക് മുന്കൂര് ജാമ്യം. എസ്ഐ എം.നിജേഷ്, സിപിഒ പ്രജീഷ്, എഎസ്ഐ അരുണ്, സിപിഒ ഗിരീഷ് എന്നിവര്ക്കാണ് മുന്കൂര് ജാമ്യം ലഭിച്ചത്. കോഴിക്കോട് പ്രിന്സിപ്പല്സ് സെഷന്സ് കോടതിയാണ് പ്രതികളായ പൊലീസുകാര്ക്ക് ജാമ്യം അനുവദിച്ചത്.
ഹൃദയാഘാതം മൂലമാണ് മരണം സംഭവിച്ചതെന്നും മര്ദിച്ചിട്ടില്ലെന്നും സ്റ്റേഷനിലെ സി.സി.ടി.വി ദൃശ്യങ്ങള് പരിശോധിച്ചാല് മനസിലാകുമെന്നും പ്രതിഭാഗം കോടതിയില് പറഞ്ഞു.
ഹൃദയാഘാതത്തിലേക്ക് നയിച്ചത് മാനസികവും ശാരീരികവുമായ സമ്മര്ദ്ദമാണെന്ന് ജില്ലാ പ്രോസിക്യൂട്ടര് പറഞ്ഞു. സുഖമില്ലാത്ത കാര്യം പറഞ്ഞെങ്കിലും ഇക്കാര്യം ഒരു മണിക്കൂര് അവഗണിച്ചു. കഴിഞ്ഞ മാസം 21 ന് രാത്രിയാണ് സജീവന് വടകര സ്റ്റേഷന് വളപ്പില് കുഴഞ്ഞുവീണ് മരിച്ചത്. നിജേഷിനെതിരെയും പ്രജീഷിനെതിരെയും മനപൂര്വമല്ലാത്ത നരഹത്യയ്ക്ക് ക്രൈംബ്രാഞ്ച് കേസെടുത്തിരുന്നു.
