മസ്കത്ത്: രാജ്യത്ത് കുറ്റകൃത്യങ്ങള് തടയുന്നതിന്റെ ഭാഗമായി റോയല് ഒമാന് പൊലീസ് നടത്തുന്ന ശക്തമായ അന്വേഷണത്തില് വിവിധ ഗവര്ണറേറ്റുകളില് പിടിയിലായത് നിരവധി കുറ്റവാളികള്.
സ്ത്രീകളടക്കമുള്ളവരാണ് പിടിയിലായത്. തലസ്ഥാന നഗരമായ മസ്കത്തില് കടകളില് മോഷണം നടത്തുന്ന രണ്ടുപേരെ ക്രിമിനല് ഇന്വെസ്റ്റിഗേഷന് ജനറല് ഡയറക്ടറേറ്റ് അറസ്റ്റ് ചെയ്തു. ഇവര് മോഷണത്തിന് ഉപയോഗിക്കുന്ന ഉപകരണങ്ങളും രക്ഷപ്പെടാന് ഉപയോഗിച്ച വാഹനവും പൊലീസ് കണ്ടെടുത്തു. വീടുകളില്നിന്ന് സ്വര്ണാഭരണങ്ങളും പണവും കവരുന്നത് പതിവാക്കിയ അഞ്ചംഗ സംഘം റോയല് ഒമാന് പൊലീസിന്റെ വലയിലാണ് കുടുങ്ങിയത്.
അല് ദാഹിറ ഗവര്ണറേറ്റിലാണ് ഒരു സ്ത്രീയടങ്ങുന്ന സംഘം കവര്ച്ച നടത്തിയിരുന്നത്. പരാതികള് ലഭിച്ചതിനെ തുടര്ന്ന് അല് ദാഹിറ ഗവര്ണറേറ്റ് പൊലീസ് കമാന്ഡ് നടത്തിയ അന്വേഷണത്തിലാണ് ഇവര് പിടിയിലായത്. തെക്കന് ബാത്തിന ഗവര്ണറേറ്റില് നടന്ന മറ്റൊരു സംഭവത്തില് കേബിളുകള് മോഷ്ടിക്കുന്നയാളെ പൊലീസ് അറസ്റ്റ് ചെയ്തു. നഖ്ല് വിലായത്തിലെ ഫാമില്നിന്നാണ് ഇയാള് കേബിളുകള് മോഷ്ടിച്ചിരുന്നത്. പരാതിയെ തുടര്ന്ന് തെക്കന് ബാത്തിന ഗവര്ണറേറ്റ് പൊലീസ് കമാന്ഡ് നടത്തിയ അന്വേഷണത്തിലാണ് ഇയാള് കുടുങ്ങിയത്.
അധാര്മിക പ്രവര്ത്തനങ്ങള് നടത്തിയതിന് വിദേശി വനിതകളുടെ സംഘത്തെ പൊലീസ് അറസ്റ്റ് ചെയ്തു. അല് ദാഹിറ ഗവര്ണറേറ്റ് പൊലീസ് കമാന്ഡ് നടത്തിയ അന്വേഷണത്തിലാണ് ഏഷ്യന് വംശജരായ സ്ത്രീകള് പിടിയിലായത്. അതിനിടെ, പൊതുസ്ഥലത്ത് കാറുകളില് അഭ്യാസപ്രകടനം നടത്തിയതിന് നാലുപേരെ ബുറൈമി ഗവര്ണറേറ്റ് പൊലീസ് കമാന്ഡ് പിടികൂടി. ഇവരുടെ വാഹനങ്ങളും പിടിച്ചെടുത്തു.
