പൂക്കോട് വെറ്ററിനറി കോളജ് വിദ്യാർഥി സിദ്ധാർഥന്റെ ദുരൂഹ മരണവുമായി ബന്ധപ്പെട്ട് ഇന്ന് മാതാപിതാക്കൾ സി.ബി.ഐക്ക് മൊഴി നൽകും. മാതാപിതാക്കളും അടുത്ത ബന്ധുക്കളും വയനാട്ടിലെത്തിയാണ് മൊഴി നൽകുക.അതേസമയം, കേസിൽ 20 പ്രതികൾക്ക് പുറമെ കൂടുതൽ പ്രതികളുണ്ടാവുമെന്നാണ് സൂചന. സി.ബി.ഐ കൽപറ്റ ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിൽ നൽകിയ എഫ്.ഐ.ആറിലാണ് ഇക്കാര്യമുള്ളത്.
സി.ബി.ഐയുടെ ഡൽഹി യൂനിറ്റിലെ എസ്.പി സുന്ദര്വേലിന്റെ നേതൃത്വത്തിലുള്ള നാല് ഉദ്യോഗസ്ഥരാണ് വയനാട്ടിലെത്തി അന്വേഷണം ആരംഭിച്ചത്. ഞായർ, തിങ്കൾ ദിവസങ്ങളിൽ സി.ബി.ഐ ഉദ്യോഗസ്ഥർ സർവകലാശാലയിലെത്തി തെളിവെടുത്തിട്ടുണ്ട്.വൈത്തിരി റസ്റ്റ് ഹൗസിലാണ് സി.ബി.ഐ താത്കാലികമായി ക്യാമ്പ് ചെയ്യുന്നത്. സി.ബി.ഐക്ക് വേണ്ട എല്ലാ സഹായവും ചെയ്തുകൊടുക്കണമെന്ന് പൊലീസ് മേധാവിക്ക് സംസ്ഥാന സർക്കാർ നിർദേശം നൽകിയിട്ടുണ്ട്.