ഡോ. ഷെയ്ഖ് ദര്വേഷ് സാഹിബ് ഐ.പി.എസ് പുതിയ സംസ്ഥാന പോലീസ് മേധാവി. ഡോ. വി വേണു പുതിയ ചീഫ് സെക്രട്ടറിയാകും. ഇന്ന് ചേർന്ന മന്ത്രിസഭാ യോഗത്തിലാണ് തീരുമാനം. ഈ മാസം അവസാനം ചീഫ് സെക്രട്ടറി വി.പി ജോയിയും പോലിസ് മേധാവി അനിൽകാന്തും വിരമിക്കുന്നതോടെയാകും ഇരുവരും ചുമതലയേൽക്കുക.1990 ബാച്ചിലെ ഐ.പി.എസ് ഓഫീസറായ ഡോ. ഷെയ്ഖ് ദര്വേഷ് സാഹിബ് നിലവില് ഫയര് ആന്റ് റെസ്ക്യൂ വിഭാഗം ഡയറക്ടര് ജനറലാണ്.
കേരള കേഡറില് എ.എസ്.പിയായി നെടുമങ്ങാട് സര്വ്വീസ് ആരംഭിച്ച അദ്ദേഹം വയനാട്, കാസര്ഗോഡ്, കണ്ണൂര്, പാലക്കാട്, റെയില്വേസ്, സ്റ്റേറ്റ് സ്പെഷ്യല് ബ്രാഞ്ച് എന്നിവിടങ്ങളില് എസ്.പിയായും എം.എസ്.പി, കെ.എ.പി രണ്ടാം ബറ്റാലിയന് എന്നിവിടങ്ങളില് കമാണ്ടന്റ് ആയും പ്രവര്ത്തിച്ചു. ഗവര്ണറുടെ എ.ഡി.സിയായും ഐക്യരാഷ്ട്ര സഭയുടെ മിഷന്റെ ഭാഗമായി കൊസോവയിലും സേവനം അനുഷ്ടിച്ചിട്ടുണ്ട്. എസ്.പി റാങ്കില് കൊച്ചി സിറ്റി പോലീസ് കമ്മീഷണറായും ജോലി നോക്കി.
