രാജ്യവ്യാപകമായി ജാതി സെന്സസുമായി കോണ്ഗ്രസ് മുന്നോട്ട് പോകുമെന്ന് രാഹുല് ഗാന്ധി എംപി. ഇക്കാര്യത്തെ പിന്തുണയ്ക്കുന്നതിനുള്ള പ്രമേയം കോണ്ഗ്രസ് വര്ക്കിങ് കമ്മിറ്റി ഏകകണ്ഠമായി അംഗീകരിച്ചതായും രാഹുല് ഗാന്ധി പറഞ്ഞു.അഞ്ച് സംസ്ഥാനങ്ങളിലെ തിരഞ്ഞെടുപ്പ് പ്രഖ്യാപനത്തിന് പിന്നാലെ മാധ്യമങ്ങളെ കാണുകയായിരുന്നു അദ്ദേഹം.
കോണ്ഗ്രസ് ഭരിക്കുന്ന മറ്റ് സംസ്ഥാനങ്ങളില് സെന്സസ് നടപ്പാക്കാനാണ് ആലോചന. തീരുമാനം പുരോഗമനപരമായ ഒരു കാഴ്ചപ്പാടാണെന്ന് കരുതുന്നു. ജാതി സെന്സസില് കോണ്ഗ്രസിന്റെ നിലപാട് വ്യക്തമാണെങ്കിലും പ്രതിപക്ഷ സഖ്യമായ ഇന്ഡ്യയ്ക്കുള്ളില് വ്യത്യസ്ത അഭിപ്രായങ്ങളുണ്ടാകാമെന്നും രാഹുല് ഗാന്ധി സമ്മതിച്ചു.രാജ്യത്തിന്റെ നന്മയ്ക്ക് ജാതി സെന്സസ് അനിവാര്യമാണ്.
എന്നാല് സെന്സസ് പ്രാവര്ത്തികമാക്കാന് പ്രധാനമന്ത്രിക്ക് കഴിവില്ല. കോണ്ഗ്രസിന്റെ നാല് മുഖ്യമന്ത്രിമാരില് മൂന്ന് പേരും ഒബിസി വിഭാഗത്തില് നിന്നാണ്. എന്നാല് 10 ബിജെപി മുഖ്യമന്ത്രിമാരില് ഒരു മുഖ്യമന്ത്രി മാത്രമാണ് ഒബിസി വിഭാഗത്തില് നിന്നുള്ളതെന്നും രാഹുല് ഗാന്ധി ചൂണ്ടിക്കാട്ടി.
