ചണ്ഡീഗഡ്: ഇന്ത്യന്‍ ഹോക്കി ഇതിഹാസം ബല്‍ബീര്‍ സിംഗ് (95) അന്തരിച്ചു. ചണ്ഡീഗഡിലെ സ്വകാര്യ ആശുപത്രിയില്‍വച്ചായിരുന്നു അന്ത്യം. കഴിഞ്ഞ രണ്ടാഴ്ചയായി ആരോഗ്യസ്ഥിതി മോശമായതിനെ തുടര്‍ന്ന് വെന്‍റിലേറ്ററിന്‍റെ സഹായത്താലാണ് ബല്‍ബീര്‍ സിംഗിന്‍റെ ജീവന്‍ നിലനിര്‍ത്തിയിരുന്നത്.
ബല്‍ബീര്‍ ഇന്ത്യക്കായി ഹാട്രിക് ഒളിന്പിക് സ്വര്‍ണം നേടിയ താരമാണ്. ഒളിന്പിക്സ് പുരുഷ ഹോക്കി ഫൈനലില്‍ ഏറ്റവും കൂടുതല്‍ ഗോള്‍ നേടിയ താരം കൂടിയാണ് താരം. 1952 ഹെല്‍സിങ്കി ഒളിന്പിക്സില്‍ നെതര്‍ലന്‍ഡ്സിനെതിരായ ഫൈനലില്‍ അഞ്ചു ഗോള്‍ നേടിയിരുന്നു. 6-1നായിരുന്നു അന്ന് ഇന്ത്യന്‍ ജയം.
1948, 1956 ഒളിന്പിക്സുകളില്‍ സ്വര്‍ണം നേടിയ ടീമിലെയും നിര്‍ണായക സാന്നിധ്യമായിരുന്നു ബല്‍ബിര്‍. 1958 ടോക്കിയോ ഏഷ്യന്‍ ഗെയിംസില്‍ വെള്ളി മെഡലും നേടി. 1975-ല്‍ ഹോക്കി ലോകകപ്പ് നേടിയ ഇന്ത്യന്‍ ടീമിന്‍റെ പരിശീലകനുമായിരുന്നു. അര്‍ഹതയ്ക്കുള്ള അംഗീകാരമായി 1957ല്‍ പദ്മശ്രീ പുരസ്കാരം ബല്‍ബീര്‍ സിംഗിനെ തേടിയെത്തി.
