സിപിഐഎം ജില്ലാ സമ്മേളനങ്ങള്ക്ക് ഇന്ന് തുടക്കമാകും. വിഭാഗീയതയുടെ പേരില് ഏരിയാ കമ്മിറ്റി അടക്കം പിരിച്ചുവിട്ട കൊല്ലത്താണ് ആദ്യ സമ്മേളനം. രണ്ടാം പിണറായി സര്ക്കാരിന്റെ ഭരണപരമായ വീഴ്ചകളും പാര്ട്ടി നിലപാടുകളും സമ്മേളനങ്ങളില് സജീവ ചര്ച്ചയായേക്കും.
ഇന്ന് മുതല് ഡിസംബര് 12 വരെ കൊട്ടിയം മയ്യനാട് ധവളക്കുഴിയിലെ കോടിയേരി ബാലകൃഷ്ണന് നഗറിലാണ് കൊല്ലം ജില്ലാ സമ്മേളനം. പിബി അംഗം എം.എ ബേബി പ്രതിനിധി സമ്മേളനം ഉദ്ഘാടനം ചെയ്യും.
സംസ്ഥാന സെക്രട്ടറി എം.വി.ഗോവിന്ദന്, കേന്ദ്ര കമ്മിറ്റി അംഗങ്ങള്, സംസ്ഥാന സെക്രട്ടേറിയറ്റ് അംഗങ്ങള് തുടങ്ങിയവര് പങ്കെടുക്കും. ജില്ലാ സമ്മേളനത്തില് 450 പ്രതിനിധികള് ഉണ്ട്. എന്നാല് ഇതില് കരുനാഗപ്പള്ളിയില് നിന്നുള്ള പ്രതിനിധികള് ഇല്ല. സമ്മേളനം കയ്യാങ്കളിയില് കലാശിച്ച കുരുനാഗപ്പള്ളിയില് ഏരിയ കമ്മിറ്റി പിരിച്ചുവിട്ടിരുന്നു. ഏഴ് അംഗ അഡ്ഹോക്ക് കമ്മിറ്റിയാണ് നിലവില് ഏരിയ കമ്മിറ്റിയുടെ ചുമതല വഹിക്കുന്നത്.
