വാഷിംഗ്ടണ് ഡിസി: അമേരിക്കയിലെ ഷിക്കാഗോ നഗരത്തിലുണ്ടായ വെടിവയ്പില് ഒരു വനിതാ പോലീസ് ഓഫീസര് കൊല്ലപ്പെട്ടു. 29-കാരിയായ എല്ല ഫ്രഞ്ച് ആണ് മരിച്ചതെന്ന് ഷിക്കാഗോ പോലീസ് സൂപ്രണ്ട് ഡേവിഡ് ബ്രൗണ് സ്ഥിരീകരിച്ചു. സംഭവത്തില് മൂന്നു പേരെ കസ്റ്റഡിയിലെടുത്തു.
നഗരത്തില് വാഹന പരിശോധന നടത്തവേയാണ് വെടിവയ്പുണ്ടായത്. രണ്ട് പുരുഷന്മാരും ഒരു സ്ത്രീയും സഞ്ചരിച്ച വാഹനം ഉദ്യോഗസ്ഥര് തടഞ്ഞു. ഇതിനിടെ വാഹനത്തിലുള്ളവര് പോലീസിന് നേരെ വെടിയുതിര്ക്കുകയായിരുന്നെന്ന് ബ്രൗണ് പറഞ്ഞു. വെടിവയ്പില് വാഹനത്തിലുണ്ടായിരുന്ന ഒരാള്ക്ക് ഗുരുതരമായി പരിക്കേറ്റു. ഇയാളെ ആശുപത്രിയില് പ്രവേശിപ്പിച്ചു. കസ്റ്റഡിയിലെടുത്ത മൂന്നു പേര്ക്കെതിരെയും കുറ്റം ചുമത്തിയിട്ടില്ല. സംഭവത്തില് അന്വേഷണം പുരോഗമിക്കുകയാണെന്ന് പോലീസ് അറിയിച്ചു.














