തേനി: തമിഴ്നാട് തേനി മണ്ഡലത്തിലെ ആണ്ടിപ്പട്ടിയില് ടിടികെ ദിനകരന്റെ പാര്ട്ടിയുടെ പ്രവര്ത്തകനില്നിന്നും ആദായ നികുതി വകുപ്പ് കണക്കില്പ്പെടാത്ത 1.48 കോടി രൂപ പിടിച്ചെടുത്തു. വ്യാഴാഴ്ച തെരഞ്ഞെടുപ്പ് നടക്കാനിരിക്കെ ആണ്ടിപ്പട്ടിയില് അമ്മ മക്കള് മുന്നേറ്റ കഴകം (എഎംഎംകെ) നേതാവിന്റെ വസതിയിലടക്കം റെയ്ഡ് തുടരുകയാണ്.
വാര്ഡ് നമ്ബറുകളും ഇവിടങ്ങളിലെ വോട്ടര്മാരുടെ എണ്ണവും എഴുതിയ 94 പൊതികളിലായാണ് പണം കണ്ടെടുത്തതെന്ന് ആദായ നികുതി വകുപ്പ് ഉദ്യോഗസ്ഥര് പറഞ്ഞു. ഓരോ വോട്ടര്മാര്ക്കും 300 രൂപ വീതം നല്കണമെന്നും പൊതികളില് രേഖപ്പെടുത്തിയിരുന്നതായും ആദായ നികുതി വകുപ്പ് ഉദ്യോഗസ്ഥര് വെളിപ്പെടുത്തി. റെയ്ഡിനെത്തിയ ഉദ്യോഗസ്ഥരെ എഎംഎംകെ പ്രവര്ത്തകര് പ്രതിരോധിക്കാന് ശ്രമിച്ചത് സംഘര്ഷത്തിനു കാരണമായി.
പോലീസ് ആകാശത്തേക്ക് നിറയൊഴിച്ചാണ് പ്രവര്ത്തകരെ പിരിച്ചുവിട്ടത്. എന്നാല് സംഭവത്തില് ആര്ക്കും പരിക്കില്ല.