യുവനടിയെ ബലാത്സഗം ചെയ്ത കേസില് നടനും നിര്മ്മാതാവുമായ വിജയ് ബാബു നല്കിയ മുന്കൂര് ജാമ്യ ഹര്ജിയില് ഇന്ന് ഹൈക്കോടതി വിധി . കോടതി നിര്ദേശപ്രകാരം അന്വേഷണവുമായി സഹകരിച്ചെന്നും ഇനി കസ്റ്റഡിയിലെടുത്ത് ചോദ്യം ചെയ്യേണ്ടതില്ലെന്നുമാണ് വിജയ് ബാബുവിന്റെ വാദം.
താനും നടിയുമായുള്ള ബന്ധം പരസ്പര സമ്മതത്തോടെ ആണെന്നും, പുതിയ സിനിമയില് അവസരം നല്കാത്തതിനെത്തുടര്ന്നുള്ള ബ്ലാക്ക്മെയിലിന്റെ ഭാഗമായാണ് തനിക്കെതിരെ വന്ന പരാതിയെന്നും വിജയ് ബാബു കോടതിയെ അറിയിച്ചു.
എന്നാല് വിജയ് ബാബു തന്നെ ചൂഷണം ചെയ്യുകയായിരുന്നുവെന്നും കടുത്ത ലൈംഗിക പീഡനം തനിക്ക് നേരിടേണ്ടിവന്നുവെന്നും നടിയും കോടതിയെ അറിയിച്ചിട്ടുണ്ട്. ഇവര് തമ്മിലുള്ള വാട്സാപ് ചാറ്റുകളും കോടതി പരിശോധിച്ചിരുന്നു.
വിജയ് ബാബുവിനെ കസ്റ്റഡിയില് വേണമെന്നും കൂടുതല് അന്വേഷണം നടത്തേണ്ടതുണ്ടെന്നും പ്രോസിക്യൂഷനും കോടതിയെ അറിയിച്ചിട്ടുണ്ട്. പരാതിക്കാരിയുടെ പേര് വെളിപ്പെടുത്തിയ കേസില് വിജയ് ബാബു നല്കിയ മുന്കൂര് ജാമ്യ ഹര്ജി നേരത്തെ തീര്പ്പാക്കിയിരുന്നു. കേസിന് പിറകെ ദുബൈയിലേക്ക് കടന്ന വിജയ് ബാബു കോടതി നിര്ദ്ദേശപ്രകാരമാണ് തിരിച്ചെത്തി ചോദ്യം ചെയ്യലിന് ഹാജരായത്.
