നിയമസഭയില്‍ ലൈഫ് പദ്ധതിയെക്കുറിച്ചുള്ള ചര്‍ച്ചയ്ക്കിടെ പ്രതിപക്ഷത്തെ വെല്ലുവിളിച്ച് മന്ത്രി എം.ബി രാജേഷ്. കോണ്‍ഗ്രസ് വീട് നല്‍കുമെന്നു പറഞ്ഞ 1000 ഗുണഭോക്താക്കള്‍ ആരാണെന്ന് പറയാമോ? എന്നായിരുന്നു മന്ത്രിയുടെ വെല്ലുവിളി. കെപിസിസി ആയിരം പ്രളയ ദുരിതാശ്വാസ വീടുകള്‍ നിര്‍മിച്ചു നല്‍കും എന്ന് പറഞ്ഞു എങ്കിലും 46 വീട് മാത്രമാണ് ഇതുവരെ നല്‍കിയത്. അതേസമയം 1773 വീടുകള്‍ ഇതിനകം സിപിഎം നിര്‍മിച്ചു നല്‍കിയെന്നും മന്ത്രി പറഞ്ഞു.
പാവപ്പെട്ടവര്‍ക്കും ഭവനരഹിതര്‍ക്കും വീടുവച്ച് നല്‍കാനുള്ള ലൈഫ് പദ്ധതിയില്‍ പുരോഗതിയില്ലെന്ന് പ്രതിപക്ഷം ആരോപിച്ചു. ലൈഫ് എന്നാല്‍ കാത്തിരിപ്പ് എന്നാക്കി സര്‍ക്കാര്‍ ആവാക്കിന്റെ അര്‍ത്ഥം മാറ്റിയെന്ന് അടിയന്തരപ്രമേയത്തിന് അുമതി തേടിയ പി കെ ബഷീര്‍ കുറ്റപ്പെടുത്തി. അടിസ്ഥാനരഹിതമായ ആരോപണമാണ് ഇതെന്ന് മന്ത്രി എം.ബി രാജേഷ് പറഞ്ഞു.
ലൈഫ് പദ്ധതിയില്‍ ഫീല്‍ഡ് പഠനം നടത്തിയാണ് അര്‍ഹരായ ആളുകളെ കണ്ടെത്തുന്നത്. 1,02542 പേരെ ആണ് അര്‍ഹരായി കണ്ടെത്തിയത്. പ്രതിപക്ഷം യാഥാര്‍ത്ഥ്യം അംഗീകരിക്കുന്നില്ല. 2020 ല്‍ പുതിയ ലിസ്റ്റ് ക്ഷണിച്ചു. 3,23,000 പേര്‍ക്ക് വീട് വെച്ച് കൊടുത്തു. 54,529 വീടുകള്‍ ഇപ്പോള്‍ നിര്‍മാണം നടക്കുന്നു .50,000 വീടുകള്‍ക്ക് കൂടി കൊടുക്കാന്‍ പണം ലൈഫ് മിഷന്റെ കൈവശം ഉണ്ടെന്നും മന്ത്രി പറഞ്ഞു
