തിരുവനന്തപുരം: അടച്ചുപൂട്ടലിനുശേഷം വില്ലേജ് ഓഫിസുകളും അക്ഷയകേന്ദ്രങ്ങളും തുറക്കുമ്ബോഴുണ്ടാകുന്ന തിരക്ക് ഒഴിവാക്കാന്‍ റവന്യൂ വകുപ്പ് സേവനങ്ങള്‍ മൊബൈല്‍ ഫോണ്‍ വഴി ലഭ്യമാക്കും. 24 സര്‍ട്ടിഫിക്കറ്റുകളാണ് ‘എം കേരള’ ആപ്ലിക്കേഷനിലൂടെ ലഭിക്കുക. സാക്ഷ്യപത്രങ്ങള്‍ക്കായി അപേക്ഷ നല്‍കാനും ഫീസ് ഒടുക്കാനും സാക്ഷ്യപത്രം ഡൗണ്‍ലോഡ് ചെയ്യാനും മൊബൈല്‍ ആപ്പുവഴി സാധിക്കും.
ഗൂഗ്ള്‍ പ്ലേ സ്റ്റോര്‍, ഐ.ഒ.എസ് ആപ് സ്റ്റോര്‍ എന്നിവയില്‍നിന്ന് ഡൗണ്‍ലോഡ് ചെയ്യാം. തുടര്‍ന്ന് യൂസര്‍ ഐഡി, പാസ്‌വേഡ് എന്നിവ നല്‍കണം. സര്‍വിസ്/ ഡിപ്പാര്‍ട്മെന്‍റ്സ് എന്ന ടാബില്‍നിന്ന് സര്‍ട്ടിഫിക്കറ്റുകള്‍ െതരഞ്ഞെടുക്കാം. ആവശ്യമായ വിവരങ്ങള്‍ ചേര്‍ത്ത് അപേക്ഷ സമര്‍പ്പിക്കാം.
ഫീസ് അടക്കാന്‍ ഡെബിറ്റ്/ ക്രെഡിറ്റ് കാര്‍ഡ്, ഇന്‍റര്‍നെറ്റ് ബാങ്കിങ്, ഭാരത് ക്യൂ ആര്‍ എന്നിവയിലേതെങ്കിലും തെരഞ്ഞെടുക്കാം. ആവശ്യമായ വിവരങ്ങള്‍ ചേര്‍ത്ത് അപേക്ഷ സമര്‍പ്പിക്കാം. 17 വകുപ്പുകളില്‍നിന്നുള്ള നൂറിലധികം സേവനങ്ങള്‍ ഈ ആപ് വഴി ലഭ്യമാകും. സംശയനിവാരണത്തിനും സാങ്കേതികസഹായങ്ങള്‍ക്കും ഫോണ്‍: 919633015180.
