ജയ്പുര്: രാജസ്ഥാനില് രാഷ്ട്രീയ പ്രതിസന്ധി രൂക്ഷമാകുന്നു. നിയമസഭാ സമ്മേളനം വിളിച്ചുചേര്ക്കില്ലെന്ന ഗവര്ണര് കല്രാജ് മിശ്രയുടെ നിലപാടില് പ്രതിഷേധിച്ച് മുഖ്യമന്ത്രി അശോക് ഗെഹ്ലോട്ട് എംഎല്എമാരെ രാജ്ഭവനില് അണിനിരത്തി. രാജ്ഭവനിനു മുന്നിലെ പുല്ത്തകടിയില് ഇരുന്ന എംഎല്എമാര് ഗെഹ്ലോട്ട് അനുകൂല മുദ്രാവാക്യങ്ങള് മുഴക്കി.
തിങ്കളാഴ്ച നിയമസഭ സമ്മേളനം വിളിച്ചുകൂട്ടി ഭൂരിപക്ഷം തെളിയിക്കാന് അവസരം നല്കണമെന്നാണ് മുഖ്യമന്ത്രിയുടെ ആവശ്യം. ഇക്കാര്യം ഉന്നയിച്ച് വെള്ളിയാഴ്ച ഉച്ചകഴിഞ്ഞ് ഗെഹ്ലോട്ട് ഗവര്ണറുമായി കൂടിക്കാഴ്ചയും നടത്തിയിരുന്നു. എന്നാല് കോവിഡ് വ്യാപനത്തിന്റെ പശ്ചാത്തലത്തില് നിയമസഭ വിളിച്ചുകൂട്ടാന് കഴിയില്ലെന്ന നിലപാട് ഗവര്ണര് എടുത്തതായാണ് റിപ്പോര്ട്ട്.
അനുകൂല തീരുമാനം ഉണ്ടാകുന്നത് വരെ രാജ്ഭവനുള്ളില് ധര്ണ ഇരിക്കാനും ഗെഹ്ലോട്ട് ആലോചിക്കുന്നുണ്ടെന്നാണ് വിവരം. ഗവര്ണര് വഴങ്ങിയില്ലെങ്കില് ജനങ്ങള് രാജ്ഭവന് വളയുമെന്ന് അദ്ദേഹം മുന്നറിയിപ്പും നല്കിയിട്ടുണ്ട്.