കോല്‍ക്കത്ത: രാജ്യവും ഭരണഘടനയും സംരക്ഷിക്കപ്പെടുംവരെ സത്യാഗ്രഹം തുടരുമെന്ന് പശ്ചിമ ബംഗാള്‍ മുഖ്യമന്ത്രി മമത ബാനര്‍ജി. കോല്‍ക്കത്ത പോലീസ് മേധാവിയെ ചോദ്യം ചെയ്യാനുള്ള സിബിഐ നീക്കത്തില്‍ പ്രതിഷേധിച്ച്‌ മമത ആരംഭിച്ച സത്യാഗ്രഹം രണ്ടാം ദിവസത്തിലേക്കു കടന്ന പശ്ചാത്തലത്തിലാണ് പ്രതികരണം.
ഇത് ഒരു സത്യാഗ്രഹമാണ്. രാജ്യം സംരക്ഷിക്കപ്പെടുംവരെ ഇത് തുടരും- മമത പറഞ്ഞു. രാത്രി മുഴുവന്‍ സമരപ്പന്തലില്‍ ചെലവഴിച്ച മമത, ഭക്ഷണം ഉപേക്ഷിച്ചു. കാബിനറ്റിലെ മന്ത്രിമാരും മമതയ്ക്കൊപ്പമുണ്ടായിരുന്നു. സിബിഐ നടപടിക്കെതിരെ ഞായറാഴ്ച രാത്രി എട്ടരയ്ക്കാണ് സത്യഗ്രഹം തുടങ്ങിയത്. പ്രധാനമന്ത്രിക്കെതിരെ മുദ്രാവാക്യം വിളിയുമായി നിരവധി പാര്‍ട്ടി പ്രവര്‍ത്തകരും സമരപന്തലിലുണ്ട്.
